काठमाडौं — विश्वभर झन्डै २ अर्बभन्दा धेरै प्रयोगकर्ता पुगेको म्यासेजिङ एप ‘व्हाट्सएप’ले ३ अर्बको नजिक पुग्दै गर्दा नयाँ–नयाँ सुविधा थप्न तिब्रता दिइरहेको छ। समयानुकूल नयाँ फिचर ल्याउनेक्रममा पछिल्लो समय व्हाट्सएपमा केही उपयोगी र रोचक सुविधाहरू थपिएका छन्। यी सुविधाले प्रयोगकर्ताको अनुभवलाई अझ सहज र कार्यगत बनाउने उद्देश्य राखिएको छ।
समूहमा अनलाइन संकेतमात्र होइन, कति अनलाइन छन् भन्ने पनि देखिने
अबदेखि कुनै समूह च्याटमा तलपट्टि कति जना सदस्य हाल अनलाइन छन् भन्ने संक्षिप्त जानकारी देखिनेछ। यद्यपि, को–को अनलाइन छन् भन्ने चाहिँ देखिँदैन।
महत्त्वपूर्ण समूह च्याटलाई प्राथमिकता दिने ‘हाइलाइट’ सुविधा
धेरै च्याट समूह हुँदा आवश्यक सूचना छुट्न सक्ने समस्या समाधान गर्न ‘Notify for’ सेटिङअन्तर्गत ‘Highlights’ विकल्प थपिएको छ। यसले केवल उल्लेख (mention), रिप्लाई र सम्पर्क सूचीमा रहेका व्यक्तिको सन्देश मात्र सूचित गर्ने सुविधा दिन्छ।
व्यक्तिगत च्याटमै पनि इभेन्ट बनाउन सकिने
पहिले समूह च्याटमा मात्र सम्भव भएको इभेन्ट सिर्जना अब व्यक्तिगत च्याटमा पनि गर्न सकिने भएको छ। साथै, RSVP (उत्तर दिने), अर्को व्यक्तिलाई निमन्त्रणा गर्ने, इभेन्टको समाप्ति मिति–समय राख्ने र च्याटमा पिन गर्नेसम्म सुविधा दिइएको छ।
प्रतिक्रियामाथि ट्याप गरेर अन्य प्रतिक्रिया छान्न सकिने
यदि तपाईंले च्याटमा अरूले दिएको प्रतिक्रिया चाँडै हेर्न चाहनुहुन्छ भने अब त्यसमा ट्याप गरेर अन्यले के प्रतिक्रिया दिएका छन् भन्ने सजिलै हेर्न सक्नुहुन्छ र आफूले पनि प्रतिक्रिया पठाउन सक्नुहुन्छ।
आईफोन प्रयोगकर्ताका लागि सीधा डकुमेन्ट स्क्यान गर्ने सुविधा
अब ‘Attachment’ ट्रेबाटै ‘Scan document’ छानी डकुमेन्ट स्क्यान गर्न सकिने सुविधा पनि आएको छ। यसका लागि बाहिरी एपहरू आवश्यक पर्दैनन्।
आईफोनमा व्हाट्सएपलाई डिफल्ट कल र म्यासेजिङ एपको रूपमा सेट गर्न सकिने
अब प्रयोगकर्ताले आफ्नो आईफोनमा व्हाट्सएपलाई मुख्य म्यासेज वा फोन कलको एप बनाउन सक्ने भएका छन्। यसले गर्दा फोन वा सन्देश पठाउँदा स्वतः व्हाट्सएप प्रयोग हुनेछ।
भिडियो कलमा जूम इन गर्ने सुविधा
आईफोनमा उपलब्ध अर्को सुविधा भनेको भिडीयो कलमा ‘पिन्च’ गरेर आफ्नो वा अरूको भिडियो हेर्दा जूम इन गर्न सक्ने विकल्प हो।
च्यानलको लागि QR कोड
अब च्यानल एडमिनले च्यानलको पहुँच बढाउन सीधा QR कोड सेयर गर्न सक्ने भएका छन्। यसले सदस्य थप्न सजिलो बनाउनेछ।
यी सुविधाहरू क्रमशः सबै प्रयोगकर्तामा उपलब्ध हुँदैछन्। तपाईंको एप अपडेट भयो भने यी सबै नयाँ फिचर परीक्षण गर्न सक्नुहुन्छ।
