मोवाइलमा कुराकानी भइरहेको बेला नै ठगी पत्ता लगाउने फिचर Android मा

काठमाडौँ— मोबाइलमार्फत हुने ठगी बढ्दै जाँदा Google ले Android फोनमा कल नै चलिरहेकै बेलामा प्रयोगकर्तालाई चेतावनी दिने नयाँ सुरक्षा फिचर परीक्षण गर्न थालेको छ।

कम्पनीका अनुसार, एआई–आधारित प्रणालीले कुराकानीको ढाँचा विश्लेषण गरेर शंकास्पद गतिविधि देखिए तुरुन्तै स्क्रिनमा चेतावनी देखाउनेछ ।

कलकै बीचमा ‘यो ठगी हुन सक्छ’ भन्ने सूचना

Google ले विकसित गरेको यो मोडेलले कल सुरु भएपछि प्रयोग भइरहेका शब्द, दबाब दिने शैली, व्यक्तिगत विवरण माग्ने तरिका जस्ता व्यवहार पहिचान गर्दछ ।
यदि संवाद ठगीमा देखिने सामान्य ढाँचासँग मिल्न थाल्यो भने मोबाइलले तुरुन्त प्रयोगकर्तालाई सावधान हुन संकेत गर्दछ ।

जस्तै:
बैंकको कर्मचारीको नाममा कल गर्दै खाता नम्बर, OTP, पासवर्ड माग्ने,
तुरुन्तै पैसा पठाउन दबाब दिने,
वा “तपाईँको खाता बन्द हुन्छ” प्रकारका धम्कीपूर्ण भनाइहरू प्रयोग भएमा चेतावनी सक्रिय हुने बताइएको छ।

डिभाइसमै चल्ने एआई, गोपनीयता सुरक्षित

यो फिचर Gemini Nano नामको ‘अन–डिभाइस एआई’ मा आधारित छ।
यसले आवाज वा डेटा क्लाउडमा नपठाई मोबाइलकै भित्र विश्लेषण गर्ने भएकाले गोपनीयता संरक्षण हुने Google को दाबी छ।

फिचर स्वचालित रूपमा अन हुँदैन, प्रयोगकर्ताले सेटिङमार्फत आफैं सक्रिय गर्नुपर्नेछ।

पहिलो चरणमा Pixel प्रयोगकर्ताका लागि

Google ले सुरुमा यो सुविधा Pixel फोन प्रयोगकर्तामाझ परीक्षण गर्दैछ।
सन्तोषजनक नतिजा आएपछि अन्य Android डिभाइसमा विस्तार गर्ने योजना छ तर सार्वजनिक मिति भने तोकिएको छैन।

अहिलेलाई फिचर अङ्ग्रेजीमा मात्रै काम गर्ने गरी परीक्षण गरिँदैछ।

किन आवश्यक पर्‍यो यस्तो कदम?

विश्वभर फोनमार्फत हुने बैंकिङ तथा ठगी प्रयास तीव्र रूपमा बढेका छन्।
कुराकानीको बीचमा विश्वास जितेर संवेदनशील विवरण झिक्ने घटनाले धेरै प्रयोगकर्ताले ठूलो आर्थिक क्षति व्यहोर्दै आएका छन्।

Google ले ठगी पहिचान र रोकथामलाई प्राथमिकतामा राख्दै Android मा रियल टाइम चेतावनी प्रणाली थपेको हो।

साइबर सुरक्षा विश्लेषकहरूका अनुसार यस्तो फिचरले सबै खतरा हटाइदिन्छ भन्ने होइन तर चेतावनीले प्रयोगकर्तालाई “सचेत भएर निर्णय गर्न” मद्दत गर्छ, जसले ठगीबाट जोगिने सम्भावना धेरै बढाउँछ।