काठमाण्डौं — यात्रा गर्दा वा ट्राफिक जाममा फसेका बेला धेरैले कारमै मोबाइल फोन चार्ज गर्ने गर्दछन् । सजिलो र व्यवहारिक जस्तो देखिने यो बानीले भने लामो समयपछि मोबाइलको ब्याट्रीमा नकारात्मक असर पार्न सक्दछ । विज्ञहरूका अनुसार कारमा मोबाइल चार्ज गर्दा गरिने केही सामान्य गल्तीका कारण ब्याट्री छिट्टै कमजोर हुने जोखिम बढ्दछ ।
कारको पावर सप्लाइ घर वा अफिसको बिजुली जत्तिकै स्थिर हुँदैन । गाडीको गति बढ्दा घट्दा, एसी, हेडलाइट जस्ता उपकरण चलाउँदा पावरमा उतार चढाव आउन सक्दछ । यही अस्थिर पावर मोबाइलको ब्याट्रीका लागि हानिकारक मानिन्छ ।
धेरै कारमा रहेका इन–बिल्ट यूएसबी पोर्ट पनि अर्को समस्या हुन् । यी पोर्टहरू प्रायः डेटा ट्रान्सफरका लागि बनाइएका हुन्छन्, जसले मोबाइललाई चाहिने पर्याप्त करेन्ट दिन सक्दैनन् । यसले मोबाइल ढिलो चार्ज हुने, लामो समयसम्म तातिरहने र अन्ततः ब्याट्रीको क्षमता घट्ने अवस्था आउन सक्दछ ।
त्यसैगरी, सस्तो वा प्रमाणित नभएका कार चार्जर र केबल प्रयोग गर्दा पनि जोखिम बढ्दछ । यस्ता चार्जरले आवश्यकभन्दा बढी वा कम भोल्टेज दिन सक्छन्, जसले ब्याट्रीमा अतिरिक्त दबाब पर्दछ ।
सुरक्षित चार्जका लागि के गर्ने ?
मोबाइललाई कारमा चार्ज गर्नै परेमा केही सावधानी अपनाउनु राम्रो हुन्छ । इन बिल्ट यूएसबी पोर्टको सट्टा १२ भोल्ट सिगरेट लाइटर सॉकेटमा राम्रो गुणस्तरको कार चार्जर प्रयोग गर्नु उपयुक्त हुन्छ । चार्ज गर्दा मोबाइलको कभर हटाइदिँदा ताप बाहिर जान सजिलो हुन्छ ।
कार स्टार्ट गरेपछि मात्रै मोबाइल चार्जमा लगाउने र इन्जिन बन्द गर्नुअघि चार्जर हटाउने बानी पनि उपयोगी मानिन्छ । साथै, चार्ज भइरहेका बेला नेभिगेशन, गेम वा भारी एप चलाउन सकेसम्म नहुने विज्ञहरूको सुझाव छ ।
इन्जिन बन्द अवस्थामा लामो समय मोबाइल चार्ज गर्दा कारको ब्याट्री पनि कमजोर हुन सक्दछ । यसले पछि गाडी स्टार्ट गर्न समस्या निम्त्याउन सक्दछ ।
कारमा मोबाइल चार्ज गर्नु पूर्ण रूपमा गलत होइन । तर सही तरिका नअपनाउँदा मोबाइल र कार दुवैको ब्याट्रीमा असर पर्न सक्दछ । त्यसैले साना सावधानीले ठूलो क्षतिबाट जोगिन सकिन्छ ।
