काठमाण्डौं − प्रविधि क्षेत्रको कम्पनी गुगलले आर्टिफिसियल इन्टेलिजेन्स (AI) एजेन्टहरूका लागि नयाँ खुला मापदण्ड ‘युनिभर्सल कमर्स प्रोटोकल’ (UCP) सार्वजनिक गरेको छ। अमेरिकामा आयोजित ‘नेशनल रिटेल फेडरेसन’ (NRF) २०२६ सम्मेलनमा गुगलले यस्तो प्रोटोकलको घोषणा गरेको हो, जसले मानिसको साटो एआई एजेन्टलाई नै अनलाइन किनमेल गर्न सक्षम बनाउनेछ।
यो नयाँ प्रविधिले सामान खोज्नेदेखि, भुक्तानी गर्ने र सामान घरसम्म आइपुग्दासम्मको सबै प्रक्रियालाई एउटै सुत्रमा बाँध्नेछ। गुगलले यसका लागि शपिफी (Shopify), वालमार्ट, टार्गेट र इत्सी (Etsy) जस्ता विश्वका ठूला रिटेल कम्पनीहरूसँग सहकार्य गरेको छ।
के हो ‘युनिभर्सल कमर्स प्रोटोकल’?
यो एउटा यस्तो ‘साझा भाषा’ हो जसले विभिन्न कम्पनीका एआई एजेन्ट र सपिङ प्लेटफर्महरूबीच सिधा संवाद गराउँछ। यसअघि एआईले सामान खोज्न त सघाउँथ्यो, तर खरिद गर्न प्रयोगकर्ताले आफैँ रिटेलरको वेबसाइटमा जानुपर्थ्यो। अब यो प्रोटोकलमार्फत गुगलको ‘जेमिनाई’ वा अन्य एआई एजेन्टले प्रयोगकर्ताको अनुमतिमा सिधै सामान अर्डर र पेमेन्ट गर्न सक्नेछन्।
“एआई एजेन्टहरू भविष्यमा हाम्रो किनमेलको मुख्य हिस्सा बन्नेछन्,” गुगलका सीईओ सुन्दर पिचाईले भनेका छन्, “हामीले एउटा यस्तो खुला मापदण्ड बनाएका छौँ जसले एआई र अनलाइन स्टोरहरूलाई एकअर्कासँग सजिलै कुरा गर्न सघाउँछ।”
कसरी हुन्छ काम?
- सिधा खरिद (Native Checkout): अब प्रयोगकर्ताले गुगल सर्च वा जेमिनाई एपभित्रैबाट सामान छान्न र गुगल पे (Google Pay) मार्फत तुरुन्तै पैसा तिर्न सक्नेछन्।
- बिजनेस एजेन्ट: गुगलले व्यापारीहरूका लागि ‘बिजनेस एजेन्ट’ नामक टुल पनि ल्याएको छ। यसले ग्राहकका प्रश्नहरूको जवाफ दिने र सामान छान्न मद्दत गर्ने एउटा भर्चुअल सेल्सम्यानको काम गर्नेछ।
- छुट र अफर: एआईमार्फत सामान खोज्दा ग्राहकलाई विशेष छुट (Direct Offers) समेत उपलब्ध हुनेछ।
किन ल्याइयो नयाँ प्रोटोकल?
अनलाइन सपिङमा सामान ‘कार्ट’ मा राखेर पनि नकिन्ने (Cart Abandonment) समस्या ठूलो छ। धेरै वेबसाइटमा विवरण भर्नुपर्ने झन्झटका कारण मानिसहरू बीचमै छाडिदिन्छन्। एआई एजेन्टले प्रयोगकर्ताको तर्फबाट यो झन्झटिलो काम गरिदिने हुँदा व्यापार बढ्ने र उपभोक्ताको समय बच्ने गुगलको दाबी छ।
गुगलले यसलाई ‘ओपन स्ट्याण्डर्ड’ बनाएको छ, जसको अर्थ अन्य कम्पनीहरूले पनि यसलाई आफ्नो सिस्टममा राख्न सक्नेछन्। यसले गर्दा भविष्यमा एआई एजेन्टहरू केवल गुगलमा मात्र सीमित नभई इन्टरनेटका सबै प्लेटफर्ममा एकसाथ काम गर्न सक्नेछन्।
