काठमाण्डौं − राजावादी प्रदर्शनको प्रचारका लागि एकै दिन ५० लाखभन्दा बढी मोबाइलमा पठाइएको ‘बल्क एसएमएस’ का कारण प्रयोगकर्ताको डेटा सुरक्षामाथि प्रश्न उठेपछि निजी क्षेत्रको दूरसञ्चार प्रदायक एनसेलले स्पष्टीकरण दिएको छ। कम्पनीले एक विज्ञप्ति जारी गर्दै उक्त अनधिकृत र राजनीतिक प्रकृतिका सन्देशहरू आफ्ना ग्राहकको मोबाइलसम्म नपुगेको दाबी गरेको हो।
यस घटनालाई गम्भीरतापूर्वक लिँदै एनसेलले आफ्नो भ्यालु एडेड सर्भिस (भ्यास) साझेदार कम्पनी आकाश टेक लाई सचेत गराएको छ। राजनीतिक स्वार्थका लागि दूरसञ्चार नेटवर्कको दुरुपयोग गर्ने प्रवृत्तिप्रति ‘जिरो टोलरेन्स’ को नीति लिइएको एनसेलको भनाइ छ।
डेटा सुरक्षामा अन्तर्राष्ट्रिय मापदण्ड एनसेलले आफू नेपालकै पहिलो आईएसओ (ISO 27001 र ISO 27701) प्रमाणित कम्पनी भएको स्मरण गराउँदै ग्राहकको व्यक्तिगत गोपनीयतामा कुनै सम्झौता नहुने स्पष्ट पारेको छ। “हामीले प्राविधिक र सम्झौतागत रूपमै कडा सुरक्षा कवच तयार पारेका छौँ, जसका कारण हाम्रा प्रयोगकर्ताको डेटा कुनै पनि अनधिकृत समूहसँग साझा गरिँदैन,” विज्ञप्तिमा भनिएको छ।
नेपाल टेलिकम र एनसेलको फरक दाबी यही प्रकरणमा सरकारी स्वामित्वको नेपाल टेलिकम ले भने आफ्नो प्रणाली प्रयोग गर्ने सेवा प्रदायकबाट सर्तविपरीत राजनीतिक सन्देश गएको स्वीकार गरिसकेको छ। टेलिकमले गल्ती स्वीकार गरिरहँदा एनसेलले भने आफ्नो ‘फिल्टरिङ’ प्रणालीका कारण ग्राहक जोगिएको दाबी गरेको हो। बिना अनुमति लाखौँको इनबक्समा पुगेको यो सन्देशले डिजिटल सुरक्षा र चुनावी आचारसंहितामा नयाँ चुनौती थपेको छ।
