युट्युबको सस्तो ‘प्रिमियम लाइट’ योजना, कम खर्चमा विज्ञापनरहित भिडियो हेर्न पाइने, यस्ता छन् विशेषता

काठमाण्डौं — भिडियो स्ट्रिमिङ प्लेटफर्म YouTube ले प्रयोगकर्तालाई कम शुल्कमा विज्ञापनरहित भिडियो हेर्ने विकल्प दिने उद्देश्यले ‘YouTube Premium Lite’ नामको नयाँ सदस्यता योजना ल्याएको छ। यो योजना पूर्ण YouTube Premium भन्दा सस्तो भए पनि अधिकांश भिडियो बिना विज्ञापन हेर्न सकिने सुविधा प्रदान गर्दछ।

यो सेवा विशेषगरी युट्युबमा नियमित रूपमा भिडियो हेर्ने तर पूर्ण प्रिमियम प्याकेजका सबै सुविधा आवश्यक नपर्ने प्रयोगकर्तालाई लक्षित गरेर तयार गरिएको हो। कम शुल्क तिरेर पनि कम अवरोधसहित भिडियो हेर्न सक्ने अनुभव दिनु यसको मुख्य उद्देश्य हो।

प्रिमियम लाइटमा के के सुविधा छन्

युट्युब प्रिमियम लाइटको मुख्य विशेषता अधिकांश भिडियोमा देखिने विज्ञापन हटाउनु हो। क्रिएटरहरूले अपलोड गरेका धेरैजसो भिडियो तथा YouTube Kids सामग्री विज्ञापनबिनै हेर्न सकिन्छ।

तर केही सामग्रीमा भने अझै विज्ञापन देखिन सक्दछ। आधिकारिक म्युजिक भिडियो, कभर गीत, डान्स भिडियो, YouTube Shorts तथा प्लेटफर्ममा खोजी वा ब्राउज गर्दा विज्ञापन देखिने सम्भावना रहने बताइएको छ।

फेब्रुअरी २०२६ मा यस योजनामा दुई महत्वपूर्ण सुविधा थपिएका छन्। यसअघि यी सुविधा केवल पूर्ण प्रिमियम सदस्यतामा मात्र उपलब्ध थिए।

पहिलो, Background Playback – यसले भिडियो चलिरहेको अवस्थामा मोबाइलमा अन्य एप प्रयोग गर्दा वा स्क्रिन लक गर्दा पनि भिडियो चलिरहने सुविधा दिन्छ।
दोस्रो, Offline Download –  यसले इन्टरनेट नहुँदा पछि हेर्नका लागि भिडियो डाउनलोड गरेर सुरक्षित राख्न अनुमति दिन्छ।

यी सुविधा अधिकांश गैर संगीत भिडियोमा काम गर्दछन्, तर Shorts मा भने लागू हुँदैनन्। मोबाइल वा ट्याब्लेटमा धेरै भिडियो हेर्ने प्रयोगकर्ताका लागि यो अपडेटले योजनालाई थप उपयोगी बनाएको छ।

प्रिमियम लाइटमा के के सुविधा छैन

प्रिमियम लाइट पूर्ण प्रिमियम योजनाभन्दा सीमित सुविधासहित आउँछ। उदाहरणका लागि YouTube Music Premium यसमा समावेश छैन। त्यसैले युट्युब वा YouTube Music एपमा संगीत सुन्दा विज्ञापन देखिन सक्दछ।

त्यस्तै केही लोकप्रिय प्लेब्याक सुविधा पनि यसमा उपलब्ध छैनन्। जस्तै:

• Jump Ahead
• Queue प्रणाली
• Continue Watching

यस बाहेक Picture-in-Picture मोड, प्रिमियम प्लेब्याक नियन्त्रण, 1080p Premium भिडियो गुणस्तर, 256 kbps अडियो गुणस्तर, Smart Downloads, तथा नयाँ फिचरको प्रारम्भिक पहुँच जस्ता सुविधा पनि लाइट संस्करणमा समावेश गरिएको छैन।

यी सीमितताका कारण प्रिमियम लाइटको शुल्क पूर्ण प्रिमियम योजनाभन्दा निकै कम राखिएको हो।

मूल्य कति छ र कहाँ उपलब्ध छ

अमेरिकामा YouTube Premium Lite को मासिक शुल्क ७.९९ डलर तोकिएको छ। तुलनात्मक रूपमा पूर्ण YouTube Premium व्यक्तिगत योजनाको मूल्य मासिक १३.९९ डलर रहेको छ।

यो योजना अर्जेन्टिना, अस्ट्रेलिया, ब्राजिल, क्यानडा, चिली, कोलम्बिया, फ्रान्स, जर्मनी, बेलायत, भारत, इटाली, जापान, मेक्सिको, फिलिपिन्स, पोल्याण्ड, रोमानिया, सिंगापुर, दक्षिण कोरिया, स्पेन, ताइवान, थाइल्याण्ड र टर्की लगायतका देशमा पनि उपलब्ध छ। शुल्क भने देशअनुसार फरक फरक हुन सक्छ।

पूर्ण प्रिमियम योजनाभन्दा फरक रूपमा प्रिमियम लाइटमा हालसम्म फ्यामिली, मल्टि युजर वा विद्यार्थी योजना उपलब्ध छैन। वार्षिक अग्रिम भुक्तानी गर्ने विकल्प पनि दिइएको छैन।

तर प्रयोगकर्ताले Google खातामार्फत लगइन गरेपछि यो सेवा मोबाइल, ट्याब्लेट, ल्यापटप र स्मार्ट टिभी जस्ता विभिन्न उपकरणमा प्रयोग गर्न सकिन्छ।

कसका लागि उपयुक्त

युट्युबमा मुख्यत  भिडियो सामग्री हेर्ने र धेरै सुविधा आवश्यक नभए पनि विज्ञापनबाट छुटकारा चाहने प्रयोगकर्ताका लागि प्रिमियम लाइट उपयोगी मानिन्छ।

विशेषगरी मोबाइल वा ट्याब्लेटमा धेरै भिडियो हेर्ने, मल्टिटास्किङ गर्दा भिडियो सुन्ने वा यात्रा गर्दा अफलाइन भिडियो हेर्न चाहने प्रयोगकर्ताले यसबाट लाभ लिन सक्छन्। साथै YouTube Kids सामग्री विज्ञापनबिनै उपलब्ध हुने भएकाले साना बालबालिका भएका परिवारका लागि पनि यो योजना उपयुक्त हुन सक्दछ।

तर यदि प्रयोगकर्ताले प्राय  म्युजिक भिडियो, गीतका कभर, डान्स भिडियो वा Shorts बढी हेर्ने गर्छन् भने प्रिमियम लाइट पर्याप्त नहुन सक्छ। त्यस्तो अवस्थामा पूर्ण YouTube Premium योजना नै उपयुक्त विकल्प हुने बताइएको छ।

कसरी सदस्यता लिने

प्रिमियम लाइट प्रयोग गर्न चाहनेले मोबाइल वा डेस्कटपबाट youtube.com/premiumlite मा गएर “Get Premium Lite” विकल्प छनोट गर्नुपर्दछ। त्यसपछि Google खातामा लगइन गरी भुक्तानी विवरण प्रविष्ट गरेर सदस्यता पुष्टि गर्न सकिन्छ।

सदस्यता सक्रिय भएपछि अधिकांश भिडियोमा विज्ञापन नदेखिने, ब्याकग्राउन्ड प्लेब्याक र अफलाइन डाउनलोड जस्ता सुविधा तुरुन्त प्रयोग गर्न सकिन्छ।

सदस्यता कसरी रद्द वा अपग्रेड गर्ने

सदस्यता रद्द गर्न youtube.com/paid_memberships पेजमा गएर “Manage membership” विकल्प खोल्नुपर्दछ। त्यसपछि “Deactivate” छनोट गरी कारण उल्लेख गरेर सदस्यता समाप्त गर्न सकिन्छ।

यदि प्रयोगकर्ताले थप सुविधा चाहेर पूर्ण प्रिमियम योजनामा अपग्रेड गर्न चाहेमा सोही पेजबाट “Learn more” अन्तर्गत YouTube Premium छनोट गरेर नयाँ योजना सक्रिय गर्न सकिनेछ।