काठमाण्डौं — विश्वप्रविधि बजारमा सुरक्षा चुनौतीहरू जटिल बन्दै गएका बेला चिनियाँ प्रविधि जायन्ट हुवावेले नयाँ ‘क्लाउड वाइफाइ सोलुसन’ (Cloud Wi-Fi Solution) सार्वजनिक गरेको छ। स्पेनको बार्सिलोनामा जारी ‘मोबाइल वर्ल्ड कंग्रेस (MWC) २०२६’ मा हुवावेले उद्योग र व्यवसायहरूको सुरक्षालाई ध्यानमा राख्दै यो ‘फ्युचर-रेडी’ प्रविधि ल्याएको हो।
परम्परागत नेटवर्क प्रणालीले आधुनिक सुरक्षा खतराहरूलाई थेग्न नसक्ने भएपछि हुवावेले नेटवर्क तहदेखि आइओटी (IoT) उपकरण र एप्लिकेशनसम्मै सुरक्षा कवच प्रदान गर्ने गरी यो प्रणाली विकास गरेको छ।
हुवावेको नयाँ प्रविधिका तीन मुख्य विशेषता:
१. लुकेका क्यामेरा सजिलै पत्ता लाग्ने (Privacy Security): विशेषगरी होटल र बिजनेस कन्फरेन्सहरूमा लुकेका क्यामेरा (Hidden Camera) ठूलो समस्याका रूपमा देखिँदै आएका छन्। हुवावेले यसका लागि ‘आई-गार्ड’ (iGuard) नामक हाते उपकरण सार्वजनिक गरेको छ। यसले ४जी, ५जी, वाइफाइ वा एसडी कार्ड प्रयोग गरेर सूचना सङ्कलन गर्ने जुनसुकै लुकेका क्यामेरालाई पनि तत्काल पहिचान गर्न सक्छ। यसबाट व्यक्तिगत गोपनीयता र व्यापारिक गोपनीयता चोरी हुने जोखिम अन्त्य हुने दाबी गरिएको छ।
२. मानवीय उपस्थिति अनुसार ऊर्जा बचत (Spatial Security): विद्यालय वा ठूला कार्यालयका छत, गल्ली र सिँढीहरू जहाँ सीसीटीभी क्यामेरा पुग्न सक्दैनन् त्यहाँ यो प्रविधिले ‘इन्टेलिजेन्ट वाइफाइ’ मार्फत घुसपैठ पत्ता लगाउँछ। साथै यो प्रणालीले लाइट र एयर कन्डिसन (AC) सँग समन्वय गरी कोठामा मान्छे आउँदा बल्ने र जाँदा निभ्ने बनाउँछ जसले गर्दा कार्यालयहरूको ऊर्जा खपत २० प्रतिशतभन्दा बढीले घट्नेछ।
३. क्लाउडमा आधारित एकीकृत सुरक्षा (Private-line Security): धेरै ब्रान्डका सुरक्षा उपकरण राख्नुपर्ने र दक्ष प्राविधिक टोली पाल्नुपर्ने झन्झटलाई यसले अन्त्य गरिदिएको छ। हुवावेको ‘सिंहे एआई क्वानकुन’ (Xinghe AI Qiankun) सोलुसनले क्लाउडबाटै सबै सुरक्षा प्रणाली नियन्त्रण गर्छ। कम्पनीहरूले अब ‘प्लग-एन्ड-प्ले’ मार्फत केही मिनेटमै आफ्नो सुरक्षित नेटवर्क स्थापना गर्न सक्नेछन्।
दूरसञ्चार प्रदायकलाई नयाँ अवसर
यस प्रविधिमार्फत टेलिकम सेवा प्रदायकहरूले ‘सेफ स्टे’ (SafeStay) र ‘सेफ स्टडी’ (SafeStudy) जस्ता थप सुविधासहितका प्याकेजहरू बेच्न सक्नेछन्। यसले सेवा प्रदायकहरूलाई केवल इन्टरनेट दिने कम्पनीबाट माथि उठाएर ‘हाइ-भ्यालु सर्भिस पार्टनर’ बनाउन मद्दत पुग्ने हुवावेको विश्वास छ।
हुवावेले भविष्यमा विश्वभरका दूरसञ्चार कम्पनीहरूसँग मिलेर यो ‘क्लाउड वाइफाइ’ प्रणालीलाई थप परिष्कृत गर्दै लैजाने र उद्योगहरूलाई थप सुरक्षित र दिगो बनाउने प्रतिबद्धता व्यक्त गरेको छ।
