काठमाण्डौं — टेकमाण्डु डटकममा प्रकाशित ‘एनसेलको सिएसआरमा विचलन’ सम्बन्धी समाचारप्रति एनसेलले आफ्नो गम्भीर ध्यानाकर्षण भएको जनाएको छ। कम्पनीले यस संस्थामा इमेल गर्दै उक्त समाचार एकपक्षीय भएको दाबी गरेको छ।
एनसेलका अनुसार कम्पनीले औद्योगिक व्यवसाय ऐन २०७६ र नियमावली २०७८ ले तोकेको मापदण्डभित्र रहेर नै कुल खूद नाफाको १ प्रतिशत रकम सामाजिक कार्यमा खर्च गरिरहेको छ।
एनसेलका मुख्य दाबीहरू:
- शैक्षिक सामग्री वितरण: समाचारमा ‘झोला वितरण’ भनिएको कार्यक्रमबाट देशभरका १० हजारभन्दा बढी विद्यार्थी लाभान्वित भइसकेको र यसको माग अझै बढिरहेको कम्पनीको भनाइ छ।
- विविध कार्यक्रम: शैक्षिक सामग्री बाहेक स्टेम एजुकेशन (STEM), डिजिटल लिटरेसी, स्वास्थ्य, वातावरण र विपद् व्यवस्थापन जस्ता आधा दर्जनभन्दा बढी क्षेत्रमा दीर्घकालीन प्रभाव पार्ने कार्यक्रमहरू सञ्चालन भइरहेको एनसेलले स्पष्ट पारेको छ।
- प्रक्रियागत पारदर्शिता: साझेदार संस्था वा एजेन्सी छनोट गर्दा स्थापित मापदण्ड र मूल्याङ्कन प्रणालीका आधारमा गरिने भन्दै कम्पनीले ‘आफ्नै गोजीका एजेन्सी’ भन्ने आरोपको खण्डन गरेको छ।
- कानुनी पालना: सिएसआर सम्बन्धी वार्षिक प्रगति विवरण उद्योग विभागमा नियमित रूपमा पेस गरिरहेको र यसमा कुनै पनि विचलन नरहेको कम्पनीको दाबी छ।
एनसेलकी कर्पोरेट कम्युनिकेसन एन्ड सस्टेनेबिलिटी डाइरेक्टर विशाखा लक्ष्मी खड्काद्वारा प्रेषित पत्रमा सामाजिक जिम्मेवारीलाई ‘प्रचारमुखी गति विधि ‘ का रूपमा चित्रण गरिनु कम्पनीको योगदानको अवमूल्यन भएको उल्लेख छ।
