काठमाण्डौं — के तपाईंसँग सामाजिक सञ्जालमा सेयर गरिएका लामा-लामा लेख र समाचार पढ्ने समय छैन? अब चिन्ता नगर्नुहोस् एलन मस्कको कम्पनी ‘X’ ले तपाईंको यो समस्याको समाधान निकालेको छ। आर्टिफिसियल इन्टेलिजेन्स (AI) को सहयोगमा अब एक्सले प्लेटफर्ममा पोस्ट गरिएका लामा लेखहरूको मुख्य अंश (Summary) तुरुन्तै तयार पारिदिनेछ।
प्रयोगकर्ताको समय बचाउन र जानकारी छिटो उपलब्ध गराउन एक्सले ‘एआई-पावर्ड समराइज’ (Summarise) फिचर सार्वजनिक गरेको हो।
कसरी काम गर्छ यो फिचरले?
अब एक्स प्लेटफर्ममा कुनै पनि लामो लेखको साथमा एउटा ‘समराइज’ बटन देखा पर्नेछ। प्रयोगकर्ताले उक्त बटनमा क्लिक गर्नेबित्तिकै एआईले त्यो पुरै लेखको निचोडलाई बुँदागत रूपमा (Bullet points) केही सेकेन्डमै प्रस्तुत गरिदिनेछ।
एक्सका प्रोडक्ट हेड निकिता बियरका अनुसार यो फिचर विशेष गरी ती प्रयोगकर्ताहरूका लागि ल्याइएको हो जो हतारमा हुन्छन् र थोरै समयमा धेरै जानकारी लिन चाहन्छन्।
सुन्न मिल्ने फिचरपछि अर्को ठूलो अपडेट
एक्सले केवल पढ्ने मात्र होइन सुन्ने सुविधामा पनि जोड दिइरहेको छ। हालै मात्र कम्पनीले ‘ग्रोक भ्वाइस’ प्रविधिमा आधारित ‘लिसन’ (Listen) फिचर पनि ल्याएको थियो। यसको मद्दतले प्रयोगकर्ताले टाइमलाइन स्क्रोल गर्दा वा फोन लक गरेर पनि समाचार सुन्न सक्छन्। पछिल्लो तीन महिनामा एक्समा आर्टिकलहरूको प्रचलन १८ गुणाले बढेपछि कम्पनीले यस्ता नयाँ टुलहरू थप्न थालेको हो।
के एआई सारांश पूर्णत विश्वसनीय छ?
प्रविधि विज्ञहरूका अनुसार एआईले तयार पारेको सारांश निकै छिटो र उपयोगी भए पनि यसलाई पूर्ण रूपमा सत्य मान्न सकिँदैन। कहिलेकाहीँ एआईले लेखको गम्भीरता र सन्दर्भ (Context) बुझ्न गल्ती गर्न सक्छ। त्यसैले गम्भीर र संवेदनशील समाचारका लागि भने पुरै लेख पढ्नु नै बढी भरपर्दो हुने सुझाव विज्ञहरूको छ।
