एक्समा आयो पोस्ट आफैँ अनुवाद हुने र एआईले फोटो मिलाउने फिचर

काठमाण्डौं — सामाजिक सञ्जाल प्लेटफर्म ‘एक्स’ (पूर्व ट्विटर) ले आफ्ना प्रयोगकर्ताका लागि एआईमा आधारित दुई नयाँ विशेष सुविधाहरू सार्वजनिक गरेको छ। कम्पनीले आर्टिफिसियल इन्टेलिजेन्स ‘ग्रोक’ (Grok) को प्रयोग गरी पोस्टहरूको स्वचालित अनुवाद (अटोमेटिक ट्रान्सलेसन) र फोटो सम्पादन (फोटो एडिटर) फिचर सुरु गरेको हो।

प्रयोगकर्ताको अनुभवलाई थप सहज र प्रभावकारी बनाउन यी अपडेटहरू ल्याइएको एक्सले जनाएको छ। मंगलबार अबेर एक्सका प्रोडक्ट हेड निकिता बियरले विश्वभरका प्रयोगकर्ताका लागि स्वचालित अनुवाद सुविधा उपलब्ध गराउन थालिएको जानकारी दिइन्।

स्वचालित अनुवाद र नियन्त्रण

नयाँ फिचर अनुसार अब एक्समा भएका पोस्टहरू स्वत अनुवाद हुनेछन्। यदि प्रयोगकर्तालाई कुनै खास भाषाको स्वचालित अनुवाद आवश्यक नभएमा  पोस्टमा रहेको ‘गियर’ आइकनमा थिचेर त्यसलाई बन्द गर्न सक्ने सुविधा समेत दिइएको छ। विश्वभरका प्रयोगकर्तामाझ पोस्टको पहुँच बढाउन रेडिट जस्ता अन्य सामाजिक सञ्जालले पनि यसअघि यस्तै अभ्यास गर्दै आएका छन्।

प्राकृतिक भाषाबाटै फोटो सम्पादन

एक्सले आफ्नो आइओएस (iOS) एपमा नयाँ इमेज एडिटर पनि थपेको छ। यसमा चित्र कोर्ने (ड्रइङ) र टेक्स्ट राख्ने साधारण टुल्सका साथै गोपनीयताका लागि ‘ब्लर’ गर्ने सुविधा पनि छ। जसको मद्दतले प्रयोगकर्ताले फोटोमा रहेका अनुहार वा क्रेडिट कार्ड नम्बर जस्ता संवेदनशील विवरणहरू लुकाउन सक्नेछन्।

यसको सबैभन्दा रोचक पक्ष भनेको एआईको सहयोगमा हुने फोटो सम्पादन हो। प्रयोगकर्ताले साधारण भाषामा निर्देशन (Prompt) दिएर फोटो परिवर्तन गर्न सक्नेछन्। उदाहरणका लागि “यो फोटोलाई संग्रहालयमा रहेको पेन्टिङ जस्तो बनाइदेऊ” भनेर लेखेको भरमा ग्रोकले उक्त फोटोलाई सोही अनुसार तयार पारिदिनेछ। यो सुविधा छिट्टै एन्ड्रोइड प्रयोगकर्ताका लागि पनि उपलब्ध हुने कम्पनीले जनाएको छ।

विवाद र सुरक्षा चासो

यसअघि  बिना अनुमति अरूको फोटोलाई आपत्तिजनक (यौनजन्य) स्वरूपमा परिवर्तन गर्न मिल्ने सुविधाका कारण एलन मस्कको चर्को आलोचना भएको थियो। त्यसपछि कम्पनीले इमेज जेनेरेसन सुविधा केवल सशुल्क प्रयोगकर्ताका लागि मात्र सीमित गरेको थियो। यद्यपि  यो नयाँ एआई फोटो एडिटर फिचर सबैका लागि खुला हुनेछ वा सशुल्क प्रयोगकर्ताका लागि मात्रै भन्नेबारे एक्सले अझै स्पष्ट पारेको छैन।

यसअघि गुगल र एडोबी जस्ता ठूला प्रविधि कम्पनीहरूले पनि यस्तै किसिमका एआई-पावर्ड फोटो सम्पादन सुविधाहरू बजारमा ल्याइसकेका छन्।