काठमाण्डौं — प्रविधि क्षेत्रको दिग्गज कम्पनी गुगलले आफ्नो आर्टिफिसियल इन्टेलिजेन्स (AI) प्लेटफर्म ‘जेमिनाई’ मा नयाँ अपडेट ल्याएको छ । गुगलले बिहीबार ‘जेमिनाई’ को ‘पर्सनल इन्टेलिजेन्स’ फिचरमा ‘नानो बनाना’ (Nano Banana) द्वारा सञ्चालित इमेज जेनेरेसन प्रविधि थप गरिएको घोषणा गरेको हो ।
यस नयाँ सुविधासँगै अब जेमिनाईले प्रयोगकर्ताको व्यक्तिगत सन्दर्भ र रुचिलाई बुझेर तस्बिरहरू तयार गर्नेछ ।
व्यक्तिगत रुचि र सन्दर्भको स्वत पहिचान
यो फिचरको मुख्य विशेषता भनेको प्रयोगकर्ताले तस्बिर बनाउनका लागि विस्तृत विवरण (Prompt) दिइरहनु पर्दैन । जेमिनाईले प्रयोगकर्ताको गुगल अकाउन्ट, जिमेल र गुगल फोटोज जस्ता माध्यमबाट प्राप्त डेटाका आधारमा प्रयोगकर्ताको मनपर्ने कुरा र रुचिहरू पहिले नै बुझिसकेको हुन्छ ।
उदाहरणका लागि यदि तपाईंलाई टेनिस र संगीत मनपर्छ भने अब ‘टेनिस र संगीतमा मेरो रुचिअनुसार ड्रिम होमको तस्बिर बनाऊ’ भन्नुको सट्टा ‘मेरो ड्रिम होम डिजाइन गर’ मात्र भन्दा पनि जेमिनाईले तपाईंको रुचि समेटेर तस्बिर बनाइदिनेछ ।
यति मात्र नभई ‘नानो बनाना’ सञ्चालित यो संयन्त्रले गुगल फोटोजमा रहेका लेबलहरू समेत बुझ्न सक्छ । प्रयोगकर्ताले ‘म र मेरो परिवारको मनपर्ने काम गरिरहेको तस्बिर बनाऊ’ भन्दा यसले फोटोमा भएको ‘फ्यामिली’ (Family) लेबल र गतिविधिलाई पहिचान गरी तस्बिर सिर्जना गर्नेछ ।
पारदर्शी स्रोत र प्रतिक्रियाको सुविधा
जेमिनाईले कुन आधारमा वा कुन सन्दर्भबाट तस्बिर तयार गर्यो भन्ने जानकारी प्रयोगकर्ताले ‘सोर्सेस’ (Sources) बटन थिचेर हेर्न सक्नेछन् । गुगलले अन्य फिचरहरूमा जस्तै यसमा पनि कहिलेकाहीँ सन्दर्भ गलत हुन सक्ने स्वीकार गर्दै प्रयोगकर्तालाई ‘फिडब्याक’ दिने विकल्प उपलब्ध गराएको छ । साथै प्रयोगकर्ताले ‘+’ आइकनमा क्लिक गरेर रेफरेन्स फोटोहरू पनि अपलोड गर्न सक्नेछन् ।
उपलब्धता
यो नयाँ फिचर आगामी केही दिनभित्र अमेरिकामा रहेका ‘प्लस’, ‘प्रो’ र ‘अल्ट्रा’ सब्सक्राइबरहरूका लागि उपलब्ध हुनेछ । गुगलले छिट्टै नै यसलाई क्रोम डेस्कटप र अन्य प्रयोगकर्ताहरूका लागि पनि विस्तार गर्ने योजना बनाएको छ ।
गुगलले यसै वर्षको सुरुमा ‘पर्सनल इन्टेलिजेन्स’ सुरु गरेको थियो भने मार्च महिनामा अमेरिकाका सबै प्रयोगकर्ताका लागि खुला गरिएको थियो । यसै साता मात्र यो फिचर भारत र जापान लगायतका देशहरूमा पनि विस्तार गरिएको छ ।
