काठमाण्डौं — सामाजिक सञ्जाल X (यसअघि ट्वीटर) ले आफ्नो म्यासेजिङ सेवालाई छुट्टै एपको रूपमा सार्वजनिक गरेको छ। कम्पनीले शुक्रबारदेखि iOS प्रयोगकर्ताहरूका लागि XChat नामको स्ट्यान्ड अलोन एप विश्वभर उपलब्ध गराएको हो।
यसअघि केही सीमित Beta प्रयोगकर्ताहरूमाझ परीक्षण गरिएको यो एप अब सबै एप्पल प्रयोगकर्ताले प्रयोग गर्न पाउनेछन्। X मा भएका आफ्ना कन्ट्याक्टहरूसँग कुराकानी गर्न, फाइल सेयर गर्न तथा अडियो र भिडियो कल गर्नका लागि यो एप डिजाइन गरिएको छ।
‘एभ्रिथिङ एप’ को रणनीतिमा परिवर्तन?
मस्कले X लाई ‘एभ्रिथिङ एप’ बनाउने र सबै सेवा एउटै प्लेटफर्ममा समेट्ने घोषणा गरेका थिए। तर म्यासेजिङका लागि छुट्टै एप ल्याउने निर्णयले उनको अघिल्लो रणनीतिमा केही परिवर्तन आएको संकेत गर्दछ।
अहिले मस्कको AI कम्पनी xAI (जसले X को स्वामित्व राख्छ र आफैं SpaceX अन्तर्गत छ) ले प्रयोगकर्ताको सहजताका लागि विभिन्न सेवाका छुट्टाछुट्टै एपहरूको ‘सुइट’ नै तयार गरिरहेको छ। म्यासेजिङ बाहेक भुक्तानी सेवा (Payments) का लागि पनि छुट्टै एपको परीक्षण भइरहेको छ यद्यपि त्यो अझै सार्वजनिक भइसकेको छैन।
के के छन् विशेषता ?
XChat ले प्रयोगकर्ताको गोपनीयतालाई प्राथमिकता दिएको दाबी गरेको छ। यसका प्रमुख विशेषताहरू निम्न छन्:
- म्यासेजिङ र कलिङ: व्यक्तिगत र ग्रुप च्याटसँगै उच्च गुणस्तरको अडियो भिडियो कल।
- गोपनीयता: म्यासेज एडिट र डिलिट गर्न सकिने, Disappearing Messages को सुविधा र स्क्रिनसट ब्लक गर्न मिल्ने फिचर।
- विज्ञापनरहित: कम्पनीका अनुसार यो एपमा कुनै पनि विज्ञापन (Ads) वा ट्रयाकिङ मेकानिजम राखिएको छैन।
- Encryption: सबै म्यासेजहरू End-to-end Encrypted र PIN Protected हुने दाबी गरिएको छ।
सुरक्षामाथि विज्ञहरूको प्रश्न
कम्पनीले सुरक्षाको पूर्ण ग्यारेन्टी गरे पनि साइबर सुरक्षा विज्ञहरूले भने यसअघि नै आशंका व्यक्त गरेका छन्। Signal जस्ता सुरक्षित म्यासेजिङ एपको तुलनामा XChat को सुरक्षा प्रणाली कमजोर रहेको विज्ञहरूको तर्क छ। एप सार्वजनिक भएसँगै सुरक्षाका मापदण्डहरूमा सुधार भए नभएको बारे विज्ञहरूले पुन अध्ययन गर्ने बताइएको छ।
Communities अब XChat मा
यसैबीच X ले आफ्नो प्लेटफर्ममा रहेको Communities फिचर बन्द गर्ने निर्णय गरेको छ। अत्यधिक स्पाम र प्रयोगकर्ताको कम रुचिका कारण बन्द हुन लागेको कम्युनिटीका सदस्यहरूलाई अब XChat मा स्थानान्तरण गरिनेछ। यसले एपको सुरुवाती डाउनलोड संख्या बढाउन मद्दत पुग्ने अपेक्षा गरिएको छ।
X का लीड डिजाइनर बेन्जी टेलरका अनुसार यो त सुरुवात मात्र हो। उनले सामाजिक सञ्जालमा लेख्दै भनेका छन् “हामीले म्यासेजिङका लागि जे बनाउँदैछौँ XChat त्यसको एउटा सानो सुरुवात मात्र हो।”
