काठमाण्डौं — विश्वप्रसिद्ध प्रविधि कम्पनी गुगलले आफ्ना विभिन्न एपहरूको ‘आइकन’ (Icon) मा व्यापक हेरफेर गर्ने भएको छ । लामो समयदेखि प्रयोगमा रहेका परम्परागत चार रङका आइकनहरूलाई हटाएर गुगलले अब नयाँ र आधुनिक ‘ग्रेडियन्ट’ लुक भित्र्याउन लागेको हो ।
यो परिवर्तनसँगै अब गुगलका प्रयोगकर्ताले जीमेल, ड्राइभ, डक्स, मिट र क्यालेन्डर जस्ता एपहरूलाई नयाँ स्वरूपमा देख्न पाउनेछन् । गुगलले सन् २०२५ को अन्त्यतिरबाटै केही आइकनहरूमा यो नयाँ डिजाइन परीक्षण गर्न सुरु गरेको थियो जसलाई अब पूर्ण रूपमा कार्यान्वयनमा ल्याउँदैछ ।
किन परिवर्तन हुँदैछ डिजाइन ?
यसअघि गुगलका अधिकांश एपहरूमा रातो, निलो, हरियो र पहेंलो रङको मिश्रण प्रयोग गरिएको थियो । सबै एपका आइकनहरू एकैनासका रङ र बनोटका हुँदा प्रयोगकर्ताहरू झुक्किने र कुन एप कुन हो भनेर चिन्न समय लाग्ने समस्या देखिएको थियो । प्रयोगकर्ताको यही अलमललाई हटाउन र एपहरूलाई प्रस्ट पहिचान दिन गुगलले आइकनको आकार, रङ र शैलीमा फेरबदल गरेको हो ।
नयाँ डिजाइनमा प्रत्येक एपको आफ्नै विशिष्ट रङ र स्पष्ट आकार हुनेछ । आइकनको पछाडि रहने ‘ब्याकग्राउन्ड’ हटाएर यसलाई अझ ठूलो र आकर्षक बनाइएको छ जसले स्मार्टफोनको स्क्रिनमा यसलाई झट्ट चिन्न सजिलो बनाउनेछ ।
प्रमुख एपहरूमा के के बदलिँदैछ ?
गुगलले नयाँ आइकनहरूमा ‘सफ्ट ग्रेडियन्ट’ र पेस्टल रङहरूको प्रयोग गरेको छ । कुन एपमा के परिवर्तन भयो ? हेरौँ विस्तृतमा:
- गुगल ड्राइभ (Google Drive): ड्राइभको नयाँ आइकनबाट रातो रङ पूर्ण रूपमा हटाइएको छ । अब यो हरियो, पहेंलो र निलो रङमा देखिनेछ । यसको आकारलाई ‘राउन्डेड ट्रयाङ्गल’ (गोलो कुना भएको त्रिभुज) बनाइएको छ ।
- जीमेल (Gmail): जीमेलको प्रख्यात ‘M’ आकारको खाम पहिलेकै जस्तो रहे पनि यसको कुनाहरूलाई अझ बढी गोलो बनाइएको छ । विशेष कुरा के छ भने सबै एपहरू मध्ये जीमेल मात्र यस्तो एप हो जसमा अझै पनि गुगलका चारै रङ कायम राखिएको छ ।
- गुगल मिट (Google Meet): मिटको आइकनमा ठूलो परिवर्तन गरिएको छ । यसलाई क्यामेराको आकारमै राखिए पनि मुख्य रङ परिवर्तन गरी ‘पहेंलो’ बनाइएको छ ।
- गुगल च्याट (Google Chat): यसको आइकन अब ‘पिल’ (Pill) आकारको मेसेज बबल जस्तो देखिनेछ जसमा मुस्कान (Smile) को चिन्ह रहनेछ ।
- क्यालेन्डर र टास्क (Calendar & Tasks): क्यालेन्डर अब आफ्नो पुरानो नीलो रङमा फर्किएको छ भने ‘टास्क’ एपलाई ट्याप गर्न मिल्ने गोलो बटन जस्तो स्वरूप दिइएको छ ।
- डक्स, सिट्स र स्लाइड्स (Docs, Sheets & Slides): यी एपहरूमा अब एकै किसिमको रङको प्रयोग हुनेछ । ‘सिट्स’ र ‘स्लाइड्स’ लाई ल्यान्डस्केप आकारमा ढालेर यसको वास्तविक प्रयोगलाई झल्काउन खोजिएको छ ।
एआई (AI) को संकेत
गुगलका अनुसार यो नयाँ डिजाइन केवल सौन्दर्यका लागि मात्र नभई एपहरूमा थपिएका अत्याधुनिक एआई (AI) फिचरहरूको संकेत पनि हो । कम्पनीले गुगल एप, जेमिनाई (Gemini), म्याप्स र फोटोसमा यो नयाँ लुकको झलक यसअघि नै देखाइसकेको छ ।
आइकनको कुनालाई थप गोलो बनाइएकाले यी आइकनहरू अब पहिलेभन्दा धेरै आधुनिक र ‘स्मूथ’ देखिने दाबी गरिएको छ । यो परिवर्तनले गुगल इकोसिस्टममा काम गर्ने प्रयोगकर्ताहरूको अनुभवलाई अझ सहज र छरितो बनाउने अपेक्षा गरिएको छ ।
