काठमाण्डौं — लोकप्रिय सोसल मिडिया प्लेटफर्म स्न्यापच्याट (Snapchat) ले विज्ञापनको दुनियाँमा नयाँ प्रयोग गर्दै ‘एआई-पावर्ड कन्भर्सेसनल एड्भरटाइजिङ’ फिचर सार्वजनिक गरेको छ। कम्पनीले मंगलबार “AI Sponsored Snaps” सार्वजनिक गर्दै प्रयोगकर्ताहरूलाई ब्रान्डका एआई एजेन्टहरूसँग सिधै अन्तरक्रिया गर्ने सुविधा दिएको हो।
यसअघि स्न्यापच्याटको मुख्य ‘च्याट ट्याब’ मा देखिने विज्ञापनहरूमा प्रयोगकर्ताले प्रतिक्रिया दिन पाउँदैनथे। तर यो नयाँ फिचरको सुरुवातसँगै अब प्रयोगकर्ताले विज्ञापनमै विभिन्न प्रश्नहरू सोध्न, जानकारी लिन र सामान खरिदका लागि सुझावहरू समेत माग्न सक्नेछन्।
च्याटिङमार्फत सामानको खोजी र निर्णय
स्न्यापका चिफ बिजनेस अफिसर अजित मोहनका अनुसार विज्ञापनको क्षेत्रमा अब ‘कुराकानी’ (Conversation) सबैभन्दा मूल्यवान् पक्ष बन्दै गएको छ। एआईले यो परिवर्तनलाई तीव्र बनाउँदै च्याटलाई नै नयाँ उत्पादनहरू खोज्ने, प्रश्न सोध्ने र तत्काल निर्णय लिने प्रभावकारी माध्यममा परिणत गरिदिएको उनको तर्क छ। स्न्यापच्याटको मुख्य उद्देश्य नै मानिसहरूले दैनिक रूपमा गर्ने सामान्य कुराकानीकै शैलीमा विज्ञापनलाई पनि सहजै ढाल्नु हो।
यो नयाँ फिचर ब्रान्डहरूका लागि समेत निकै फलदायी हुने देखिएको छ। यसअन्तर्गत ब्रान्डहरूले आफ्नै AI agents लाई प्लेटफर्ममा ल्याएर प्रयोगकर्तासँग सिधै संवाद गराउन सक्नेछन् जसले गर्दा स्न्यापच्याटका करिब १ अर्ब मासिक सक्रिय प्रयोगकर्ताहरूमाझ पुग्न सहज हुनेछ। कम्पनीको सुरुवाती तथ्याङ्कले समेत Sponsored Snaps ले अन्य विज्ञापनको तुलनामा २२ प्रतिशत बढी ‘कन्भर्सन’ र २० प्रतिशत कम लागतमा उत्कृष्ट नतिजा दिइरहेको पुष्टि गरेको छ।
एआई र विज्ञापनप्रति प्रयोगकर्ताको आकर्षण
सामान्यतया हरेक डिजिटल प्लेटफर्ममा एआई र विज्ञापनको बढ्दो प्रवेश धेरै प्रयोगकर्तालाई झर्कोलाग्दो लाग्न सक्छ। तर स्न्यापच्याटले भने आफ्ना प्रयोगकर्ताहरू एआई प्रविधिसँग पहिल्यैदेखि अभ्यस्त भइसकेको दाबी गरेको छ। सन् २०२३ मा पहिलोपटक AI chatbot सार्वजनिक गरेयता मात्रै ५० करोडभन्दा बढी प्रयोगकर्ताले यससँग संवाद गरिसक्नुले पनि यसको लोकप्रियता पुष्टि गर्ने कम्पनीको तर्क छ।
स्न्यापच्याटले सार्वजनिक गरेको पछिल्लो रोचक तथ्याङ्कअनुसार ८५ प्रतिशत प्रयोगकर्ताहरू नियमित रूपमा ‘च्याट फिड’ मा सक्रिय रहने गर्दछन्। सन् २०२६ को पहिलो त्रैमासिक (Q1 2026) मा मात्रै प्रयोगकर्ताहरूले ९५० अर्बभन्दा बढी सन्देशहरू आदानप्रदान गरेका थिए। विशेषगरी किशोर प्रयोगकर्ताहरूमाझ यो प्लेटफर्म निकै लोकप्रिय छ जहाँ ५७ प्रतिशतले दैनिक म्यासेज पठाउँछन् भने १० मध्ये ४ जनाले दिनमा धेरै पटक च्याटिङ गर्ने गर्दछन्। प्रयोगकर्ताहरूको यही च्याटिङ गर्ने बानीलाई विज्ञापनको आधार बनाउँदै स्न्यापच्याटले डिजिटल मार्केटिङलाई नयाँ उचाइमा पुर्याउने लक्ष्य राखेको छ।
