काठमाण्डौं — छोटा भिडिओ रुचाउने दर्शकलाई अब लामो समयसम्म अड्याइराख्ने रणनीतिमा मेटा लागेको छ। फेसबुक र इन्स्टाग्राममा छरिएर रहेका रिल्स (Reels) लाई एउटै ठाउँमा समेटेर ‘सिरिज’ (Series) का रूपमा प्रस्तुत गर्न मिल्ने नयाँ फिचरको कम्पनीले परीक्षण गरिरहेको छ।
अब छानिएका केही क्रिएटरहरूले आफ्ना पुराना र नयाँ रिल्सलाई जोडेर एउटा शृङ्खला वा सिरिज बनाउन सक्नेछन्। क्रिएटरको प्रोफाइलमै यसका लागि छुट्टै हब (hub) हुनेछ जहाँ हरेक रिल्स एउटा एपिसोडको रूपमा रहनेछ। यो सुविधा ठ्याक्कै टिकटकले दिइरहेको जस्तै छ।
छिटो छिटो स्क्रोल (scroll) गरिने छोटा भिडिओको साटो दर्शकलाई लामो समयसम्म इन्गेज गराउने मेटाको सोच देखिन्छ। यसबाट दर्शकहरू बारम्बार फर्केर आउने र उनीहरूमा भिडिओ हेर्ने बलियो बानी विकास हुने कम्पनीको अपेक्षा छ। क्रिएटरहरूलाई पनि ट्युटोरियल र च्यालेन्ज जस्ता एपिसोडिक भिडिओहरू व्यवस्थित रूपमा राख्न यो फिचरले निकै सजिलो बनाउनेछ।
कुनै क्रिएटरले ‘१० दिनको बेकिङ च्यालेन्ज’ गरिरहेको छ भने उसले ती १० वटै भिडिओलाई एउटै सिरिजभित्र राख्न सक्छ। क्रिएटरको प्रोफाइलमा आउने नयाँ ट्याबमा गएर दर्शकले सबै एपिसोड एकै ठाउँमा पाउनेछन्। आफूले जहाँसम्म हेरेर छोडेको हो त्यहीँबाटै निरन्तरता दिन मिल्ने सुविधा पनि यसमा छ।
फिड (feed) वा रिल्स ट्याबमा स्क्रोल गर्दा कुनै सिरिजको एउटा भिडिओ भेटियो भने त्यहीँबाट पूरै सिरिज हेर्ने विकल्प पनि प्रयोगकर्ताले पाउनेछन्। पछि हेर्नका लागि वा अपडेट रहन सिरिजलाई सेभ गरेर राख्न पनि सकिन्छ।
मेटाले यो नयाँ फिचरबाट कसरी आम्दानी गर्ने (monetize) भन्ने विषयमा पनि छलफल भइरहेको बताएको छ यद्यपि यसको ठोस खाका भने बाहिर आइसकेको छैन। प्रतिस्पर्धी प्लेटफर्म टिकटकले सन् २०२३ मै यस्तो सिरिज फिचर ल्याइसकेको थियो। टिकटकमा क्रिएटरले प्रिमियम कन्टेन्टहरू पेवाल (paywall) भित्र राखेर बेच्न सक्छन्। मेटाले पनि भविष्यमा यस्तै मोडल अपनाउन सक्ने अनुमान गरिएको छ।
हाल परीक्षणको क्रममा रहेको यो सुविधा अहिले इन्स्टाग्राम र फेसबुकमा पहिलेदेखि नै शृङ्खलाबद्ध कन्टेन्ट राख्दै आएका सीमित क्रिएटर र कन्टेन्ट प्रोड्युसरहरूलाई मात्र उपलब्ध गराइएको छ। शृङ्खलाबद्ध भिडिओहरूले राम्रो चर्चा पाउन थालेको देखेपछि मेटाले दर्शकलाई हरेक एपिसोड सजिलै भेटाउन यो फिचर ल्याएको हो।
