काठमाण्डौं — दूरसञ्चार सेवा प्रदायक कम्पनी एनसेलको ललितपुर, नख्खुस्थित अत्याधुनिक डाटा सेन्टरले विश्व प्रतिष्ठित अन्तर्राष्ट्रिय प्रमाणीकरण प्राप्त गरेको छ । एनसेल बिजनेसअन्तर्गत सञ्चालित यस डाटा सेन्टरले ‘एएनएसआई/टीआईए–९४२–सी (ANSI/TIA-942-C) रेटेड ३ डिजाइन एन्ड कन्स्ट्रक्टेड फसिलिटी’ प्रमाणीकरण पाएको हो ।
यो सफलतासँगै एनसेलको डाटा सेन्टर डिजाइन र निर्माण दुवै विधामा यस्तो अन्तर्राष्ट्रिय मान्यता पाउने नेपालकै पहिलो डाटा सेन्टर बनेको छ । सरकारद्वारा सूचीकृत नेपालको पहिलो इन्टिग्रेटेड डाटा सेन्टर र क्लाउड सेवाको रूपमा रहेको यस सेन्टरले पाएको यो ‘टीएर थ्री’ (Tier III) प्रमाणीकरणले यसको उच्च गुणस्तर, सुरक्षा र विश्वसनीयतालाई विश्वस्तरिय प्रमाणित गरेको छ ।
टेलिकम्युनिकेशन इन्डस्ट्री एसोसिएसन (टीआईए) बाट अधिकारप्राप्त अडिट संस्था ‘डाटा सेन्टर मिडिया एलएलपी’ले यसको मूल्यांकन र प्रमाणीकरण गरेको हो ।
९९.९८२% अपटाइमको ग्यारेन्टी
यो प्रमाणीकरणले एनसेलको डाटा सेन्टरमा कुनै प्राविधिक गडबडी आउँदा वा मर्मतसम्भार गर्नुपर्दा पनि सेवा अवरुद्ध नहुने (कन्करेन्ट्ली मेन्टेनेबल) कुराको सुनिश्चितता गर्दछ । पूर्ण रूपमा अतिरिक्त (रिडन्डेन्ट) विद्युत आपूर्ति, कुलिङ प्रणाली र नेटवर्कको बलियो ब्याकअपका कारण यो डाटा सेन्टरले ९९.९८२ प्रतिशत समय निरन्तर सेवा (अपटाइम) दिन सक्दछ । यसको अर्थ पूर्व निर्धारित मर्मत वा आकस्मिक घटनाहरूमा पनि ग्राहकको सेवा रोकिने छैन ।
नेपालकै डिजिटल पूर्वाधारका लागि कोशेढुङ्गा
यस उपलब्धिलाई एनसेलका प्रमुख कार्यकारी अधिकृत (सीईओ) माइकल फोलेले एनसेल र नेपाल दुवैका लागि एक महत्वपूर्ण कोशेढुङ्गा मानेका छन् ।
“हामी विश्वस्तरीय डिजिटल पूर्वाधार उपलब्ध गराउन प्रतिबद्ध छौँ, जसले स्थानीय व्यवसायहरूलाई विस्तार गर्न आत्मविश्वास दिन्छ र सरकारको डिजिटल रूपान्तरणको महत्वकांक्षामा पनि योगदान पुर्याउँछ,” सीईओ फोलेले भने, “कुनै पनि अवस्थामा सेवा अवरुद्ध भएको परिकल्पना समेत गर्न नसक्ने संवेदनशील क्षेत्रका ग्राहकहरूले अब नेपालमै होस्ट गरिएका सुरक्षित र सधैँ उपलब्ध सेवाहरूमा ढुक्कले भरोसा गर्न सक्दछ ।”
सूचना सुरक्षामा आईएसओको मोहर
टीएर थ्री प्रमाणीकरण बाहेक एनसेलको डाटा सेन्टर सूचना सुरक्षा र गोपनीयताको मामिलामा पनि अब्बल मानिएको छ । उत्कृष्ट अन्तर्राष्ट्रिय अभ्यास अपनाएबापत यसले सूचना सुरक्षाका लागि ‘आईएसओ २७००१’ (ISO 27001) र गोपनीयता व्यवस्थापनका लागि ‘आईएसओ २७७०१’ मान्यता यसअघि नै पाइसकेको छ । साथै उच्च गुणस्तरीय सेवा र वातावरणीय प्रभाव न्यूनीकरणप्रति कम्पनीको प्रतिबद्धतालाई ‘आईएसओ ९००१’ र ‘१४००१’ प्रमाणीकरणले पनि पुष्टि गरिसकेका छन् ।
व्यवसाय र देशलाई के फाइदा ?
यो प्रमाणीकरणसँगै एनसेल बिजनेसले आफ्ना कर्पोरेट ग्राहकहरूलाई अझ सुरक्षित सेवा दिने क्षमता प्रमाणित गरेको छ:
- व्यवसायलाई निरन्तरता: बैंक तथा वित्तीय संस्था, बीमा कम्पनी, सरकारी निकाय र साना ठूला व्यवसायका बैंकिङ कारोबार, ईआरपी (ERP) प्लेटफर्म र अनलाइन सेवाहरूमा डाउनटाइम (सेवा निष्क्रिय हुने समय) लगभग शून्य हुनेछ ।
- विपद् व्यवस्थापन: बलियो ब्याकअप र बिल्ट इन रिडन्डेन्सीका कारण साइबर आक्रमण वा प्राकृतिक विपत्तिको समयमा पनि व्यवसाय निरन्तर सुचारु गर्न सकिनेछ ।
- डाटा सार्वभौमिकता: यो सफलताले नेपाली डाटालाई नेपालमै सुरक्षित रूपमा होस्ट गर्न सघाउनेछ । यसबाट विदेशी पूर्वाधारप्रतिको निर्भरता घट्ने र नेपाललाई उदीयमान डिजिटल हबको रूपमा विकास गर्न मद्दत पुग्नेछ ।
एनसेलको यो कदमले नेपालको डिजिटल रूपान्तरण र डाटा सुरक्षाको क्षेत्रमा ठूलो विश्वास जगाउने अपेक्षा गरिएको छ ।
