काठमाण्डौं — दूरसञ्चार सेवा प्रदायक कम्पनी एनसेलले आफ्ना ग्राहकका लागि यात्रा र साहसिक गतिविधिमा आकर्षक छुटसहितको नयाँ अफर ल्याएको छ । यसका लागि एनसेलले चर्चित ट्राभल प्लेटफर्म ‘ट्रिप टर्बो’सँग सम्झौता गरेको छ ।
अब एनसेलका प्रयोगकर्ताले एनसेल एपको प्रयोग गरी बस र आन्तरिक हवाई टिकट बुकिङ गर्दा वा विभिन्न साहसिक गतिविधिमा सहभागी हुँदा विशेष छुट र लाभ लिन सक्नेछन् ।
कति पाइन्छ छुट ?
कम्पनीका अनुसार यो अफरको फाइदा लिन ग्राहकले एनसेलको ९९ रुपैयाँ वा सोभन्दा बढी मूल्यको कुनै पनि प्याक खरिद गरेको हुनुपर्नेछ ।
प्याक खरिद गरेपछि ग्राहकले ट्रिप टर्बोमार्फत विभिन्न मनोरञ्जनात्मक तथा साहसिक गतिविधिमा ८ हजार रुपैयाँसम्मको भारी छुट प्राप्त गर्न सक्नेछन् । त्यसैगरी, एपमार्फत पहिलो पटक आन्तरिक हवाई टिकट काट्दा २०० रुपैयाँ र त्यसपछिका हरेक उडान टिकटमा १४० रुपैयाँ छुट पाइनेछ । साथै, बसको टिकट बुकिङमा पनि हरेक पटक १११ रुपैयाँ छुटको व्यवस्था गरिएको कम्पनीले जनाएको छ ।
कसरी लिने यो सुविधा ?
यो विशेष छुटको लाभ लिन निकै सहज छ । यसका लागि ग्राहकले आफ्नो मोबाइलमा रहेको ‘एनसेल एप’ खोलेर त्यहाँ भित्र रहेको ‘पार्टनर्ड सर्भिसेज’ (Partnered Services) सेक्सनमा जानुपर्नेछ । त्यहाँ रहेको ‘ट्रिप टर्बो’ विकल्प छनोट गरेर ग्राहकले डिजिटल रूपमै आफ्नो यात्राको योजना बनाउन र छुटको फाइदा लिन सक्नेछन् ।
यस सम्झौताका विषयमा बोल्दै एनसेलका चिफ कन्ज्युमर बिजनेस अफिसर उपाङ्ग दत्ताले एनसेल अब कनेक्टिभिटीमा मात्र सीमित नरही ग्राहकको जीवनशैलीसँग जोडिन खोजेको बताए ।
“हामी ग्राहकलाई सञ्चार सेवा मात्र नभएर उहाँहरुको यात्रा र लाइफस्टाइलसँग जोडिएका विविध फाइदाहरू दिन प्रतिबद्ध छौँ,” उनले भने, “ट्रिप टर्बोसँगको सहकार्यले हाम्रा ग्राहकको यात्रालाई अझ सुविधाजनक, फलदायी र किफायती बनाउने हाम्रो विश्वास छ ।”
