काठमाडौं — एन्ड्रोइड प्रयोगकर्ताका लागि एप खोज्ने र इन्स्टल गर्ने प्रक्रिया अब झन् सहज हुने भएको छ। गुगलले आफ्नो एआई सहायक Gemini लाई Google Play Store सँग प्रत्यक्ष रूपमा जोड्ने नयाँ सुविधा सार्वजनिक गर्दै प्रयोगकर्तालाई च्याटबाटै एप खोज्ने, सिफारिस लिने, खरिद गर्ने र इन्स्टल गर्ने सुविधा दिन थालेको छ।
गुगलले यो Google Play connected app for Gemini को पहिलो झलक Google I/O 2026 मा देखाएको थियो। अहिले भने यो सुविधा विस्तारै एन्ड्रोइड प्रयोगकर्तामाझ उपलब्ध गराउन थालिएको छ। नयाँ एकीकरणसँगै अब Play Store मा जानै नपरी Gemini मार्फत विभिन्न एप पत्ता लगाउने, खरिद गर्ने र अन्य काम पूरा गर्न सकिनेछ।
यसअघि Gemini ले आवश्यक एपको नाम सिफारिस गर्ने काम मात्र गर्थ्यो। अब भने प्रयोगकर्ताले आफ्नो आवश्यकताअनुसार एप खोज्न सक्नेछन्। उदाहरणका लागि अन्तर्राष्ट्रिय यात्रा गर्न मिल्ने म्याप एप वा भोजन योजना बनाउन उपयोगी प्रोडक्टिभिटी एप खोज्न Gemini लाई सोध्न सकिनेछ। त्यसपछि Gemini ले उपयुक्त एपहरू देखाउने मात्र होइन ती एपको Play Store पेज पनि खोलिदिने भएकाले डाउनलोड गर्न निकै सहज हुनेछ।
यो सुविधा डिजिटल कारोबारमा पनि विस्तार गरिएको छ। प्रयोगकर्ताले अब Gemini मार्फत सिधै Google Play गिफ्ट कार्ड खरिद गर्न सक्नेछन्। यस्तै आफ्नो डिभाइसमा पहिलेदेखि इन्स्टल भएका एपका केही चयन गरिएका in-app आइटम पनि Gemini बाटै खोजेर खरिद गर्न सकिनेछ। यसले विभिन्न मेनुमा पटकपटक जानुपर्ने झन्झट घटाउँदै Play Store प्रयोगलाई संवादकै माध्यमबाट सम्पन्न गर्न सकिने बनाएको गुगलको विश्वास छ।
Google Play connected app for Gemini अहिले विस्तारै एन्ड्रोइड डिभाइसमा उपलब्ध गराइँदै छ। यो सुविधा प्रयोग गर्न प्रयोगकर्ता कम्तीमा १८ वर्ष उमेरको हुनुपर्ने, व्यक्तिगत Google Account मा साइन इन गरेको हुनुपर्ने र Gemini Apps Activity (Keep Activity) सक्षम बनाइएको हुनुपर्नेछ। सुरुवाती चरणमा भने Workspace Account प्रयोगकर्ताले यो सुविधा पाउने छैनन्।
यो अपडेटलाई Gemini का अहिलेसम्मकै सबैभन्दा व्यावहारिक सुधारमध्ये एकका रूपमा हेरिएको छ। धेरै प्रयोगकर्तालाई एप इन्स्टल गर्नभन्दा पनि लाखौं एपमध्ये आफूलाई उपयुक्त एप छान्न कठिन हुने गरेको छ। केवल कीवर्डका आधारमा खोज्दा सबैभन्दा उपयुक्त विकल्प नआउने समस्या रहँदै आएको अवस्थामा Gemini ले प्रयोगकर्ताको उद्देश्य बुझेर त्यसअनुसार एप सिफारिस गर्नु एआईको अझ उपयोगी प्रयोगका रूपमा हेरिएको छ।
यो केवल अर्को नयाँ सुविधा मात्र नभई Gemini लाई दैनिक कामको मुख्य सहायक बनाउने गुगलको दीर्घकालीन योजनाको अर्को कदम पनि हो। पछिल्ला केही महिनामा Gemini लाई Chrome, Google Wallet, Messages, Phone र अहिले Google Play सँग गहिरो रूपमा जोडिएको छ। गुगलको लक्ष्य छुट्टाछुट्टै एप खोलेर काम गर्नुको सट्टा प्रयोगकर्ताले आफ्नो आवश्यकता Gemini लाई बताएपछि बाँकी काम उसैले पूरा गर्ने अनुभव उपलब्ध गराउनु रहेको देखिन्छ।
