काठमाडौं — सरकारले नेपाल दूरसञ्चार प्राधिकरणको रिक्त अध्यक्ष पदमा अर्जुन घिमिरेलाई नियुक्त गरेको छ ।
मन्त्रिपरिषद्को पछिल्लो बैठकले प्राधिकरणकै निर्देशक तथा निमित्त प्रमुखको जिम्मेवारी सम्हालिरहेका घिमिरेलाई आगामी कार्यकालका लागि अध्यक्षको जिम्मेवारी सुम्पने निर्णय गरेको हो ।
सरकारले अध्यादेशमार्फत प्राधिकरणको सिङ्गो बोर्ड रिक्त गरेपछि सञ्चार तथा सूचना प्रविधि मन्त्रालयले नयाँ नियुक्ति प्रक्रिया अगाडि बढाएको थियो । मन्त्रालयले खुला प्रतिस्पर्धाबाट अध्यक्ष चयन गर्न दरखास्त आह्वान गर्दा घिमिरेसहित ३२ जनाले आवेदन दिएका थिए ।
प्राप्त ३२ आवेदनमध्येबाट मन्त्रालयले शैक्षिक योग्यता र अनुभवका आधारमा ९ जनाको सङ्क्षिप्त सूची (शर्टलिस्ट) तयार पारेको थियो । उक्त सूचीमा घिमिरेसँगै अनन्तमान सिंह, अनिलकुमार झा, अमलेन्दु नारायण सिंह, जनार्दन भट्ट, मधुसुदन दाहाल, राजीव सुब्बा, सलाउल्लाह खान र सुशीलप्रसाद साह परेका थिए ।
गत असार २४ गते शर्टलिस्टमा परेका उम्मेदवारहरूको कार्ययोजना प्रस्तुतीकरण र अन्तर्वार्ता सम्पन्न भएको थियो ।
नवनियुक्त अध्यक्ष घिमिरेसँग प्राधिकरणमै लामो समय काम गरेको र पछिल्लो समय निमित्त प्रमुख भएर संस्था हाँकेको अनुभव छ ।
