काठमाडौं — गुगलको आर्टिफिसियल इन्टेलिजेन्स (एआई) एप जेमिनी प्रयोग गर्ने मानिसको संख्या महिनामै १ अर्ब नाघेको छ। गुगलका मुख्य कार्यकारी अधिकृत (सीईओ) सुन्दर पिचाईले सामाजिक सञ्जाल एक्स मार्फत यो जानकारी सार्वजनिक गर्दै जेमिनी गुगलको इतिहासमै सबैभन्दा तीव्र गतिमा पछ्याइरहेको र फड्को मार्न सफल प्रविधि बनेको बताएका छन्।
पिचाईका अनुसार १ अर्ब मासिक सक्रिय प्रयोगकर्ताको माइलस्टोन पार गर्ने जेमिनी गुगलको १४ औँ प्रविधि वा प्रेडक्ट बनेको छ। यसअघि ओपनएआईको च्याटजीपीटीले गत जुन महिनामै १ अर्ब मासिक प्रयोगकर्ताको आँकडा छुन सफल भएको थियो। जेमिनीको यो तीव्र विस्तारले एआईको दौडमा च्याटजीपीटीलाई कडा टक्कर दिएको विश्लेषण गरिएको छ।
गुगलले जेमिनीलाई आफ्ना विभिन्न सेवाहरू जस्तै– सर्च, वर्कस्पेस, एन्ड्रोइड प्रणाली र छुट्टै एपका रूपमा विस्तार गर्दै लगेको छ। गुगल सर्चभित्र रहेको एआई मोडले मात्रै विश्वभर १ अर्बभन्दा बढी प्रयोगकर्ता कमाइसकेको भए पनि अहिले सार्वजनिक गरिएको १ अर्बको आँकडा भने विशेषगरी जेमिनी एपका प्रयोगकर्ताहरूको मात्र भएको कम्पनीले स्पष्ट पारेको छ।
भ्वाइस फिक्सर र तस्बिर उत्पादनमा अगाडि
कम्पनीका अनुसार प्रयोगकर्ताहरूले जेमिनीलाई निकै फरक ढङ्गले प्रयोग गरिरहेका छन्:
- आवाजबाटै संवाद: जेमिनी प्रयोगकर्तामध्ये ६३ प्रतिशतले टाइप गर्नुको सट्टा सिधै भ्वाइस फिचर मार्फत एआईसँग कुराकानी गर्ने गरेका छन्।
- तस्बिर सिर्जना: जेमिनीले हाल दैनिक १५ करोडभन्दा बढी तस्बिरहरू (Images) उत्पादन गरिरहेको छ।
- आईओएसमा पनि लोकप्रिय: गुगलको आफ्नै एन्ड्रोइडबाहेक एप्पलको आईओएस (iOS) प्रणालीमा मात्रै जेमिनीका १० करोडभन्दा बढी सक्रिय प्रयोगकर्ता पुगिसकेका छन्।
नयाँ मोडल र आगामी योजना
प्रविधिलाई अझ परिष्कृत बनाउन गुगलले भर्खरै ‘जेमिनी ३.५ फ्ल्यास’ मोडल सार्वजनिक गरेको छ। यसले मुख्यगरी कोडिङ र अटोनोमस एआई-एजेन्ट सम्बन्धी कामहरूलाई थप सहज र द्रुत बनाउने गुगलको दाबी छ।
सन् २०२६ को दोस्रो त्रैमासिक (Q2) को वित्तीय विवरण सार्वजनिक गरेलगत्तै गुगलले यो सफलताको घोषणा गरेको हो। गत वर्षको तुलनामा यसका दैनिक प्रयोगकर्ता तीन गुणाले बढेका छन्। गुगलको मेड बाइ गुगल कार्यक्रम नजिकिँदै गर्दा, आगामी दिनमा पिक्सेल (Pixel) फोनहरूमा जेमिनीमा आधारित थप नयाँ र अत्याधुनिक फिचरहरू समावेश गरिने अपेक्षा गरिएको छ।
