काठमाडौं — नेपालको अग्रणी दूरसञ्चार सेवा प्रदायक एनसेल र बीवाईडी गाडीको नेपालका लागि आधिकारिक वितरक साइमेक्स इन्कबीच गाडीमै सीधै इन्टरनेट चल्ने ‘कनेक्टेड भेइकल’ सेवा उपलब्ध गराउन सम्झौता भएको छ । यस साझेदारीसँगै अब नेपालमा बिक्री हुने बीवाईडीका हरेक नयाँ गाडीमा एनसेलको ‘इन्टरनेट अफ थिङ्स’ (आईओटी) सिम इन–बिल्ट रूपमै जडान हुनेछन् ।
यो सुविधापछि बीवाईडीका ग्राहकले गाडी चलाउँदा डिजिटल कनेक्टिभिटीको नयाँ र स्मार्ट अनुभव लिन पाउनेछन् । गाडीमा आईओटी सिम जडान भएपछि इन्टरनेट चलाउन आफ्नो फोन कनेक्ट गरिरहनुपर्ने वा मोबाइलको ‘वाइफाइ हटस्पट’ अन गर्नुपर्ने झन्झट हुनेछैन ।
सिम जडान भएपछि गाडीमै इन–भेइकल इन्टरनेट कनेक्टिभिटीको सेवा उपलब्ध हुनेछ । यसबाट ग्राहकले गाडीको सिस्टम (स्क्रिन) बाटै सिधै युट्युब, स्पोटिफाइ, काराओके लगायतका अनलाइन सेवा र मनोरञ्जनात्मक सुविधाहरूको मज्जा लिन सक्नेछन् । यसले बीवाईडीको एप इकोसिस्टमलाई समेत पूर्ण रूपमा सपोर्ट गर्नेछ ।
काठमाडौंमा आयोजित सम्झौता हस्ताक्षर कार्यक्रममा बोल्दै एनसेलका चिफ कन्ज्युमर बिजनेस अफिसर उपाङ्ग दत्ताले यस सहकार्यले बीवाईडीका गाडीमा स्मार्ट कनेक्टिभिटी र इन्टेलिजेन्ट मोबिलिटीको सुविधा थप्ने बताए । “बाह्य हटस्पटमा निर्भर नभई सिधै इन्टरनेट चल्दा बाटोमा वा ट्राफिक जाममा फसेको बेला पनि भरपर्दो नेभिगेसन सुनिश्चित हुन्छ, जसले ड्राइभिङ अनुभवलाई थप सुरक्षित र सुविधाजनक बनाउँछ,” उनले भने । यसले नेपालमा आईओटी प्रविधिको विकासमा एनसेलको अग्रणी भूमिकालाई थप बलियो बनाएको उनको भनाइ छ ।
यस्तै, साइमेक्स इन्कका प्रमुख कार्यकारी अधिकृत (सीईओ) साहिल श्रेष्ठले एनसेलसँगको यो सहकार्य ग्राहकको अनुभवलाई थप उत्कृष्ट बनाउने अर्को महत्त्वपूर्ण कदम भएको बताए । “बीवाईडी सधैँ प्राविधिक नवप्रवर्तनको अग्रपङ्क्तिमा छ । भरपर्दो इन–भेइकल कनेक्टिभिटीले हाम्रा प्रयोगकर्ताहरूलाई बीवाईडी गाडीका स्मार्ट सुविधाहरू पूर्ण रूपमा उपयोग गर्न मद्दत गर्नेछ,” उनले भने ।
पुराना ग्राहकले पनि सुविधा पाउने
कम्पनीका अनुसार यो सुविधा नयाँ गाडी किन्नेले मात्र होइन, हाल बीवाईडी गाडी चढिरहेका पुराना ग्राहकले पनि लिन सक्नेछन् । पुराना ग्राहकले नेपालभर रहेका बीवाईडीका १३ वटा आधिकारिक सर्भिस सेन्टरमध्ये आफूलाई पायक पर्ने स्थानमा गएर गाडीमा एनसेलको आईओटी सिम जडान गरी यसको लाभ लिन सक्नेछन् ।
गाडीमा उपलब्ध हुने इन्फोटेनमेन्ट सुविधाहरू भने गाडीको मोडल, सफ्टवेयर र नेपालमा उपलब्ध सेवामा निर्भर हुनेछ । त्यस्तै, कनेक्टिभिटी प्लान, भ्यालिडिटी र शुल्कको विवरण भने ग्राहकले लिने सेवा प्याकेजअनुसार तय हुने कम्पनीले जनाएको छ । एनसेलको देशैभर फैलिएको नेटवर्क कभरेजका कारण ग्राहकले यात्राका क्रममा निरन्तर इन्टरनेट सुविधा पाउनेछन् ।
