काठमाडौं — निजी क्षेत्रको दूरसञ्चार सेवा प्रदायक कम्पनी एनसेलले आफ्ना ग्राहकहरूलाई लक्षित गर्दै नेपाल मेडिसिटी अस्पतालसँगको सहकार्यमा आकर्षक स्वास्थ्य सुविधा ल्याएको छ। यस साझेदारीअन्तर्गत एनसेलका ग्राहकले अब मेडिसिटी अस्पतालमा निःशुल्क तथा छुटसहितको चिकित्सक परामर्श (ओपीडी) सेवा पाउनेछन्।
मंगलबार आयोजित एक औपचारिक कार्यक्रमका बीच एनसेलका चिफ कन्ज्युमर बिजनेस अफिसर उपाङ्ग दत्ता र नेपाल मेडिसिटी अस्पतालका प्रमुख कार्यकारी अधिकृत (सीईओ) डा. अमित तोमरले यससम्बन्धी सम्झौतापत्रमा हस्ताक्षर गरेका छन्।
सम्झौताअनुसार, रु. २९९ वा सोभन्दा माथिको कुनै पनि प्याक वा रेन्टल सेवा प्रयोग गरिरहेका एनसेलका ग्राहकले नेपाल मेडिसिटी अस्पतालको बहिरङ्ग (ओपीडी) सेवामा डाक्टरसँग निःशुल्क परामर्श लिन सक्नेछन्। त्यसैगरी, रु. ९९ देखि रु. २९९ सम्मको प्याक वा रेन्टल सेवा लिएका ग्राहकका लागि भने ओपीडी परामर्श शुल्कमा २० प्रतिशत छुटको व्यवस्था गरिएको छ।
कार्यक्रममा बोल्दै एनसेलका चिफ कन्ज्युमर बिजनेस अफिसर दत्ताले यो सम्झौता ग्राहकको स्वस्थ जीवन सुनिश्चित गर्नेतर्फको एउटा महत्त्वपूर्ण कदम भएको बताए। “नेपाल मेडिसिटीको स्वास्थ्य सेवालाई एनसेलका प्याकसँग जोडेर हामीले ग्राहकलाई थप लाभ प्रदान गर्दैछौँ,” उनले भने, “यो साझेदारीले हाम्रा ग्राहकहरूलाई केवल कनेक्टिभिटी मात्र नभई स्वस्थ जीवनका लागि पनि सहयोग पुर्याउनेछ।”
त्यस्तै, मेडिसिटी अस्पतालका सीईओ डा. तोमरले कर्पोरेट र स्वास्थ्य संस्थाबीचको यस्तो सहकार्यले स्वास्थ्य सेवा प्रणालीलाई सुदृढ बनाउन मद्दत पुग्ने विश्वास व्यक्त गरे। उनले भने, “यस साझेदारीले कर्पोरेट र स्वास्थ्य संस्थाहरूले मिलेर कसरी समुदायका लागि गुणस्तरीय स्वास्थ्य सेवालाई थप पहुँचयोग्य, समावेशी र किफायती बनाउन सक्छन् भन्ने स्पष्ट पारेको छ।”
कसरी लिने सुविधा?
यस सुविधाको लाभ लिन एनसेल ग्राहकले आफ्नो मोबाइलमा रहेको ‘एनसेल एप’ (Ncell App) प्रयोग गर्नुपर्ने हुन्छ।
१. सबैभन्दा पहिले एनसेल एपमा लगइन गर्नुहोस्।
२. एपभित्र रहेको ‘पार्टनर्ड सर्भिसेज’ (Partnered Services) खण्डमा जानुहोस्।
३. त्यहाँ रहेको ‘नेपाल मेडिसिटी अस्पताल’ छनोट गर्नुहोस्।
यति गरेपछि एपले तपाईं यो सुविधाका लागि योग्य भए/नभएको विवरण स्वतः देखाउनेछ। यदि योग्य नदेखिएको खण्डमा एपबाटै आवश्यक प्याक वा रेन्टल सेवा खरिद गरी ग्राहकले तत्काल यो सुविधाको लाभ लिन सक्ने कम्पनीले जनाएको छ।
एनसेलले आफ्ना ग्राहकलाई सञ्चार सेवाबाहेक दैनिक जीवनमा अर्थपूर्ण र सान्दर्भिक सुविधाहरू उपलब्ध गराउने उद्देश्यले यस्ता सहकार्यहरूलाई निरन्तरता दिँदै आएको छ।
