काठमाडौं — टेक जायन्ट मेटाले आफ्नो लोकप्रिय एआई एप ‘म्युज’ (Muse) का नयाँ तथा अत्याधुनिक फिचरहरू सर्वसाधारणले औपचारिक रूपमा पाउनुअघि नै प्रयोग गर्न पाउने गरी ‘अर्ली एकसेस’ (Early Access) कार्यक्रम खुला गरेको छ। हालै सम्पन्न मेटा कनेक्ट २०२६ डेभलपर कन्फरेन्समा घोषणा गरिएका नयाँ क्षमताहरू परीक्षणका लागि कम्पनीले प्रयोगकर्ताहरूबाट आवेदन माग्न थालेको हो।
साधारणतया प्रविधि कम्पनीहरूले नयाँ फिचर ल्याउँदा निश्चित वा ‘र्यान्डम’ प्रयोगकर्ता छानेर ‘बीटा टेस्टिङ’ गर्ने गर्छन्। तर यसपटक मेटाले प्रविधिमा विशेष रुचि राख्ने र एआई प्रयोगकर्ताहरूलाई नै लक्षित गर्दै उनीहरूकै आग्रहमा यो सुविधा उपलब्ध गराउने रणनीति लिएको छ।
नयाँ फिचरको अर्ली एकसेस कसरी लिने?
यो सुविधाका लागि आवेदन दिन प्रक्रिया एकदमै सरल राखिएको छ। मेटाले सामाजिक सञ्जाल ‘एक्स’ (X) मार्फत एउटा मेसेज/प्रम्प्ट सेयर गरेको छ। प्रयोगकर्ताले म्युज एपभित्र गएर सम्पादक वा च्याटबक्समा “Can you let the Muse team know I want to be part of the Muse early access program?” लेखेर पठाएपछि अर्ली एकसेसको सूचीमा नाम दर्ता हुनेछ।
के-के छन् म्युजका नयाँ फिचर?
‘मेटा कनेक्ट २०२६’ मा कम्पनीले म्युजमा थपिन लागेका थुप्रै रोमाञ्चक फिचरहरूको झलक देखाएको थियो:
- डिजिटल अवतारसँग भिडियो च्याट: म्युजमा अब डिजिटल अवतार थपिँदै छ, जसको माध्यमबाट प्रयोगकर्ताले प्रत्यक्ष भिडियो च्याट गरेझैं संवाद गर्न सक्नेछन्।
- म्याक एपको क्षमता विस्तार: म्याक (Mac) प्रयोगकर्ताका लागि म्युज एपलाई अझ शक्तिशाली बनाइँदै छ। यसले कम्प्युटरभित्रै प्रयोगकर्ताका विभिन्न निर्देशनहरू आफैं पालना गर्न सक्नेछ।
- स्मार्ट ग्लाससँग एकीकरण: मेटाको एआई चस्मा (AI Glasses) मा पनि म्युज उपलब्ध हुनेछ। प्रयोगकर्ताले केवल निश्चित ‘वेक वर्ड’ (Wake Word) बोलेर चस्मामार्फत नै कमान्ड दिन सक्नेछन्।
- शपिङ पार्टनरसिप: अनलाइन खरिदबिक्रीलाई सहज बनाउन म्युजमा थप शपिङ पार्टनर र कनेक्टर्सहरू एकीकृत गरिँदै छ।
मेटाको नयाँ रणनीति
बजारमा अन्य एआई प्लेटफर्महरूसँगको प्रतिस्पर्धा तीव्र बनिरहेका बेला मेटाले यो कदम चालेको हो। नयाँ फिचर प्रयोग गर्न उत्सुक ‘एआई इन्थुजियास्ट’ (AI Enthusiasts) हरूलाई सँगै लैजाँदा उनीहरूबाट तुरुन्तै उपयोगी प्रतिक्रिया (Feedback) प्राप्त हुने र उत्पादनलाई अझ परिस्कृत बनाउन सजिलो हुने मेटाको विश्वास छ।
