काठमाडौं — आर्टिफिसियल इन्टेलिजेन्स (AI) प्रविधिमा विश्वमै अग्रस्थानमा रहेको कम्पनी ओपनएआईले आफ्नो लोकप्रिय च्याटबोट ChatGPT मा नयाँ सपिङ फिचर थप गरेको छ। अब प्रयोगकर्ताले आफूले रोजेको वा मनपरेको कपडा आफूलाई लगाउँदा कस्तो देखिन्छ भनेर च्याटजीपीटीमै हेर्न (Virtual Try-on) सक्नेछन्।
यो नयाँ सुविधामार्फत प्रयोगकर्ताले आफ्नो तस्बिर अपलोड गरेर विभिन्न पोसाक आफ्नो शरीरमा कत्तिको सुहाउँछ भन्ने कुरा डिजिटल रूपमै परीक्षण गर्न पाउनेछन्।
कसरी गर्ने प्रयोग?
च्याटजीपीटीसँग कुराकानी गर्दा कुनै पनि कपडाको सूची वा तस्बिर देखिएमा त्यसमा थिचेर ‘ट्राइ अन’ (Try on) विकल्प रोज्नुपर्ने हुन्छ। त्यसपछि प्रयोगकर्ताले आफ्नो एउटा सेल्फी र पूरा शरीर देखिने फोटो (Full-body photo) अपलोड गर्नुपर्छ।
यसका लागि च्याटजीपीटीले सिफारिस गरेका कपडा नै हुनुपर्छ भन्ने छैन। प्रयोगकर्ताले अन्य कुनै वेबसाइट वा सामाजिक सञ्जालबाट स्क्रिनसट लिएर अपलोड गरेको कपडाको तस्बिरमा पनि यो फिचरले काम गर्नेछ।
ओपनएआईका अनुसार गत सेप्टेम्बरमा सार्वजनिक गरिएको नयाँ ‘ChatGPT Images 2.5’ मोडलका आधारमा यी तस्बिरहरू तयार पारिन्छन्। यसका साथै मनपरेका पोसाकहरू पछि पुनः हेर्नका लागि एपभित्रै रहेको लाइब्रेरी (Library) मा सेभ गरेर राख्न सकिने सुविधा पनि थपिएको छ।
गुगलको सिको र ओपनएआईको रणनीति
यसअघि गुगलले सन् २०२५ मा आफ्नो सर्च इन्जिनमा यस्तै प्रकारको भर्चुअल ट्राइ-अन फिचर ल्याएको थियो। ओपनएआईले पनि सोही अवधारणालाई पछ्याउँदै आफ्नो च्याटबोटलाई अझ उपयोगी बनाउन खोजेको देखिन्छ।
यद्यपि ओपनएआई अमेजन जस्तै ठूलो अनलाइन बिक्री मञ्च (ई-कमर्स) भने होइन। तर कम्पनीले च्याटजीपीटीभित्रै खरिद बिक्री सहज बनाउन र विज्ञापनदाताहरूलाई आकर्षित गर्न निरन्तर नयाँ सपिङ औजारहरू थपिरहेको छ। एआई मोडल तालिम र सञ्चालनका लागि हुने ठूलो खर्च धान्न कम्पनीले सपिङ र व्यापारिक क्षेत्रमा सम्भावना खोजिरहेको विश्लेषण गरिएको छ।
गोपनीयताको जोखिम कायम
यो फिचर प्रयोग गर्दा व्यक्तिगत गोपनीयतामा भने ध्यान दिनुपर्ने देखिन्छ। ओपनएआईको नियम अनुसार, प्रयोगकर्ताले व्यक्तिगत खाताबाट अपलोड गरेका तस्बिरहरू कम्पनीले आफ्नो एआई मोडललाई थप तालिम दिन प्रयोग गर्न सक्छ। यदि प्रयोगकर्ताले आफ्नो तस्बिर गोपनीयताका लागि प्रयोग नहोस् भन्ने चाहन्छन् भने सेटिङमा गएर ‘अप्ट-आउट’ (Opt-out) गर्नुपर्ने हुन्छ।
