हुवावेको आम्दानीमा सुस्तता: चिनियाँ बजारमा पकड कायम, युरोप र मध्यपूर्वमा व्यापार विस्तार

बेइजिङ — चिनियाँ प्रविधि क्षेत्रको दिग्गज कम्पनी हुवावेले सन् २०२५ मा आफ्नो आम्दानीमा २.२ प्रतिशतको सामान्य वृद्धि गरेको छ। कम्पनीले सार्वजनिक गरेको वार्षिक प्रतिवेदन अनुसार गत वर्ष कुल ८८०.९ अर्ब चिनियाँ युआन राजस्व संकलन भएको छ  जुन बजारको अपेक्षा र यसका प्रतिस्पर्धी कम्पनीहरूको वृद्धिकै हाराहारीमा छ।

हुवावेको यो वृद्धिदर यसका मुख्य प्रतिस्पर्धीहरू एरिकसन र नोकियाको ‘सिंगल डिजिट’ वृद्धि प्रतिशतसँग मिल्दोजुल्दो देखिए पनि आम्दानीको आकारमा भने हुवावे निकै अगाडि छ। हुवावेको कुल राजस्व एरिकसनको तुलनामा करिब ५ गुणा बढी छ।

अनुसन्धान र विकासमा भारी लगानी

प्रतिस्पर्धालाई कायम राख्न हुवावेले अनुसन्धान र विकास (R&D) मा ठूलो रकम खर्चिएको छ। गत वर्ष कम्पनीले यस क्षेत्रमा १९२.३ अर्ब युआन लगानी गरेको छ। यो रकम एरिकसनले गरेको ४८.३ अर्ब स्वीडिस क्रोनरको लगानीभन्दा झन्डै ५ गुणा बढी हो।

कम्पनीकी वर्तमान ‘रोटेटिङ चेयरवुमन’ मेङ वान्झाउले सन् २०२५ को कार्यसम्पादनलाई “स्थिर” को संज्ञा दिँदै कर्मचारीहरूको प्रयासप्रति आभार व्यक्त गरेकीछन् । हुवावेको अनौठो नेतृत्व प्रणाली अनुसार अब मेङको स्थानमा डेभिड वाङले कार्यभार सम्हाल्दै छन् ।

व्यापारिक क्षेत्र: स्मार्टफोन र नेटवर्किङकै दबदबा

हुवावेले आफ्नो व्यवसायलाई विविधीकरण गर्ने प्रयास गरे पनि अहिले पनि यसको आम्दानीको मुख्य स्रोत नेटवर्किङ उपकरण र स्मार्टफोन नै रहेका छन्। प्रतिवेदनका अन्य मुख्य बुँदाहरू यसप्रकार छन्:

• अटोमोटिभ र ऊर्जा: कम्पनीको नयाँ अटोमोटिभ (सवारी साधन) डिभिजन र नवीकरणीय ऊर्जा क्षेत्रमा उत्साहजनक वृद्धि देखिएको छ।
• क्लाउड सेवा: कुनै समय उच्च वृद्धि देखिएको क्लाउड व्यवसाय भने अहिले स्थिर देखिएको छ।
• अन्य क्षेत्र: ‘अन्य’ विधा अन्तर्गतका व्यवसायहरूमा भने ठूलो गिरावट आएको छ।

क्षेत्रीय बजार: युरोप, मध्यपूर्व र अफ्रिकामा उछाल

अमेरिकी नेतृत्वमा विभिन्न देशहरूले लगाएको प्रतिबन्धका बाबजुद हुवावेले चिनियाँ बजार बाहिर पनि आफ्नो प्रभाव विस्तार गरिरहेको छ। विशेष गरी इएमइए (EMEA – युरोप, मध्यपूर्व र अफ्रिका) क्षेत्रमा कम्पनीले ८.८ प्रतिशतको प्रभावशाली वृद्धि हासिल गरेको छ। प्रतिबन्ध नभएका युरोपेली देशहरू र मध्यपूर्वमा हुवावेको बजार बलियो देखिएको विश्लेषण गरिएको छ।

भविष्यको रणनीति

आगामी योजनाबारे बोल्दै मेङले भनिन्, “हामी अनिश्चितताले भरिएको भविष्यतर्फ अघि बढिरहेका छौँ त्यसैले हामीले आफ्नो रणनीति र ध्यानलाई केन्द्रित राख्नुपर्छ। हामी रणनीतिलाई कार्यान्वयनमा बदल्नेछौँ, विकासकर्ताहरूको इकोसिस्टमलाई प्रोत्साहन गर्नेछौँ र उच्च गुणस्तरीय विकासलाई निरन्तरता दिनेछौँ।”

हुवावेको यो वार्षिक प्रतिवेदनले कम्पनीले चुनौतीपूर्ण विश्वव्यापी वातावरणका बीच पनि आफ्नो वित्तीय सन्तुलन कायम राख्न सफल भएको संकेत गरेको छ।